Озарбайжон пойтахти Боку шаҳрида шахмат бўйича жаҳон кубогининг 1/64 финал босқичида иштирок этадиган барча шахматчиларнинг номлари аниқланди.
Мукофот жамғармаси 2,5 миллион АҚШ доллардан зиёд бўлган мазкур нуфузли мусобақада истеъдодли шахматчиларимиз Нодирбек Абдусатторов асосий тур баҳсларида, Жавоҳир Синдоров, Нодирбек Ёқуббоев, Шамсиддин Воҳидов ва Нилуфар Ёқуббоева илк давра мусобақаларида иштирок этиши белгиланган эди.
Мусобақанинг илк даврасида қатнашган Жавоҳир Синдоров ва Нодирбек Ёқуббоев рақибларини мағлуб этиб, асосий турда қатнашиш ҳуқуқини қўлга киритган бўлса, Шамсиддин Воҳидов озарбайжонлик Абдулла Гадимбайлига, Нилуфар Ёқуббоева словакиялик Ева Репковага имакониятни бой бериб қўйди.
Куни кеча Халқаро шахмат федерацияси жаҳон кубогининг 1/64 босқичида куч синашадиган шахматчиларнинг тўлиқ рўйхатини эълон қилди. Унга кўра, Нодирбек Абдусатторов туркиялик Ваҳоб Санал билан, Жавоҳир Синдоров австриялик Маркус Раггер билан, Нодирбек Ёқуббоев венгриялик Бенжамин Гредура билан рўбарў келади. Ўйинлар 2 та турдан иборат тарзда ўтказилади.
Бугун, 2 август куни жаҳон кубогининг 1/64 финал мусобақаларининг 1-тур учрашувлари бўлиб ўтади.
Эслатиб ўтамиз, 24 августга қадар давом этадиган жаҳон кубогида 1-ўринни қўлга киритган шахматчи 111 минг, 2-ўрин соҳиби 80 минг, 3-ўриндан жой олганлар 50 минг АҚШ доллари билан тақдирланади.
Мусобақада учта совринли ўринни эгаллаганлар 2024 йили шахмат тожи учун курашадиганлар қаторига киритилади.
Т.Рўзиев,
ЎзА