Хабар берганимиздек, пойтахтимизда волейбол бўйича 16 ёшгача бўлганлар ўртасида давом этаётган қитъа чемпионати қизғин паллага кириб бормоқда.
Ўзбекистон ўсмирлар терма жамоаси чемпионатнинг ярим финал йўлланмасига эга чиқди. Ҳамюртларимиз плей-оффдаги иккинчи учрашувда эронлик тенгқурларига қарши баҳс олиб борди. Беллашув Эрон жамоасининг 3:1 ҳисобидаги ғалабаси билан якун топган бўлса-да волейболчиларимиз гуруҳ босқичини 1-ўринда якунлашга муваффақ бўлди.
Шунингдек, параллель баҳсда Япония Қозоғистонга 0:3 ҳисобида имкониятни бой бергани ва қўшимча кўрсаткичлар терма жамоамизнинг ярим финал йўлланмасига сазовор бўлишини таъминлади.
Бугун, 28 июль куни қитъа чемпионатининг навбатдаги баҳсида ҳамюртларимиз Покистонга қарши майдонга тушади. Айнан ушбу учрашув финал ва жаҳон чемпионати йўлланмасини қўлга киритишда ҳал қилувчи беллашув ҳисобланади.
Чемпионат 30 июлгача давом этади.
Т.Рўзиев,
ЎзА