Бугун, 20 июнь куни пойтахтимиздаги “Бунёдкор” стадионида Ўзбекистон-Эрон жамоалари “CAFA Nationʼs Cup 2023″ финалида омадли жамоа номига аниқлик киритса, Бангкокдаги “Таммасат” стадионида Ўзбекистон U-17 терма жамоаси Осиё Кубоги гуруҳ босқичининг иккинчи турида Ҳиндистонга қарши майдонга тушади.
Осиё кубогининг “Д” гуруҳида кейинги босқичга чиқиш учун кураш олиб бораётган ўсмирлармиз илк турда Япония термаси билан муроса йўлини танлаган эди – 1:1. Худди шунингдек, ушбу гуруҳдан жой олган Вьетнам-Ҳиндистон учрашувида ҳам дуранг натижа (1:1) қайд этилиб, 1-тур якунларидан кейин барча жамоалар 1 очкога эга бўлиб турибди.
Бугун Ўзбекистон-Ҳиндистон, Япония-Вьетнам жамоалари ўртасидаги ўйин сарҳисоби жамоаларнинг гуруҳдаги ўринлари қайси поғонада бўлишига ойдинлик киритади.
U-17 Осиё кубогида қатнашаётган терма жамоамиз аъзолари 3-тур ўйинини 23 июнь куни Вьетнам жамоасига қарши ўтказади.
Айтиш лозим, 17 ёшгача бўлган футболчилар ўртасида Таиландда ўтаётган қитъа кубоги баҳсларида 16 жамоа 4 та гуруҳга бўлинган ҳолда ғолиблик учун кураш олиб бормоқда.
Жорий йилнинг 2 июлигача давом этадиган қитъа кубогида энг яхши натижага эришган 4 та жамоа жорий йилнинг ноябрь ойида бўладиган U-17 Жаҳон чемпионатида иштирок этиш ҳуқуқини қўлга киритади.
Т. Рўзиев, ЎзА