Африка қитъасининг бир неча давлати етакчиси Россия – Украина зиддияти бўйича миссияси доирасида ишончни мустаҳкамлашга қаратилган қатор чораларни таклиф этиши мумкин, деб ёзмоқда “Reuters” ҳужжат қораламасига таяниб.
Маълум қилинишича, кўзда тутилган тадбир РФ қўшинларини орқага қайтариш, Беларусдан тактик ядро қуролини олиб кетиш, Россия Президенти Владимир Путинни “ҳибс”га олиш бўйича Халқаро жиноий суд ордери ҳаракатини тўхтатиш, шунингдек, Россияга нисбатан қўлланаётган айрим санкцияларни бекор қилиш чораларини акс эттиради. Бундан ташқари рўйхатдан “дон ва ўғит бўйича битим” ҳам жой олиши эҳтимоли бор.
Хабарда таъкидланишича, кейинчалик Россия билан Ғарб қарама-қаршилигини тўхтатиш ва музокара бошлаш бўйича келишувга эришилиши ҳам мумкин.