Фармацевтика тармоғини ривожлантириш агентлигига “Дори воситалари, тиббий буюмлар ва тиббий техника экспертизаси ва стандартлаштириш давлат маркази” томонида ўтказилган экспертиза натижалари юзасидан хат келиб тушди.
Экспертизага кўра, Тошкент шаҳридаги айрим дорихоналардан харид қилинган “Нейромидин 20 мг. таблетки №50 таблеток” (серия 40220, яроқлилик муддати 02.2025, АО “Олайнфарм”) қалбакилаштирилган дори воситаси эканлиги аниқланди.
Мувофиқлик сертификатига эга бўлмаган, давлат рўйхатидан ўтмаган, қалбакилаштирилган дори воситаси зудлик билан муомаладан чиқарилиши ҳамда инсон соғлиғига зарарли таъсирини тасдиқловчи фактлар аниқланган тақдирда муомаладан чиқариш ва йўқ қилиш тартиби тўғрисидаги низомда белгиланганидек йўқ қилиниши бўйича тегишли кўрсатма берилди.
Амалдаги қонунчиликка кўра, бу каби ҳуқуқбузарликлар маъмурий ва жиноий жавобгарликлар билан бир қаторда лицензия талаб ва шартларининг қўпол равишда бузилиши деб баҳоланиб, лицензиянинг бекор қилинишига асос бўла олади.
Севара Туляганова,
Фармацевтика тармоғини ривожлантириш
агентлиги матбуот котиби
ЎзА