Ёшлар сиёсати ва спорт вазирлиги киберспорт клубларининг умумий рейтинг кўрсаткичларида кучли бешликни эгаллаган клублар номини маълум қилди.
Биринчи ва иккинчи ўринларни пойтахтимизда фаолият кўрсатаётган “PHOENIX” вa “UMMON GAME CLUB” спорт клублари, учинчи ўринни Наманган вилоятининг “CYBERZONE”, тўртинчи ва бешинчи ўринлар Тошкент шаҳрида жойлашган “CYBERIUM” вa “IMBA” спорт клубларига тегишли бўлди.
Маълумки, Ўзбекистон Республикаси Президентининг “Киберспорт турларини янада ривожлантириш ва кенг оммалаштиришга оид қўшимча чора-тадбирлар тўғрисида”ги қарорига мувофиқ киберспорт клубларининг умумий рейтингини шакллантириш ва доимий равишда янгилаб бориш ва уларининг умумий рейтингини интернет ва ижтимоий тармоқларда эълон қилиш вазифалари белгиланган.
Мазкур қарор ижросидан келиб чиқиб, Ёшлар сиёсати ва спорт вазирлиги Рақамли технологиялар вазирлиги билан ҳамкорликда келгусида киберспорт клубларининг умумий рейтинг кўрсаткичларини доимий равишда янгилаб боришни режалаштирган.
Т.Рўзиев, ЎзА