Таиланддаги Осиё волейбол конфедерацияси штаб квартирасида турли ёш тоифалари ўртасида 2023 йил мобайнида ўтказиладиган қитъа чемпионатлари манзилларини аниқлаш ва жамоаларни гуруҳлардаги жойлашувини белгилаш юзасидан қуръа ташлаш маросими ўтказилди. Унда 16 ёшгача бўлган ўғил болалар ўртасидаги 1 – Осиё чемпионатига Ўзбекистон мезбонлик қиладиган бўлди.
Осиё волейбол конфедерацияси ижроия қўмитаси томонидан ташкил этилган маросимда Ўзбекистон волейбол федерацияси бошқарув кенгаши аъзолари онлайн тарзда иштирок этди.
Ўтказилган қуръа натижаларига кўра, волейбол бўйича Ўзбекистон терма жамоаси жорий йилда эркаклар ва аёллар ўртасидаги Осиё чемпионатида, челленж кубоги ҳамда 16 ёшгача бўлган ўғил ва қиз болалар ўртасидаги 1 – Осиё чемпионатида қайси давлатларнинг терма жамоалари билан гуруҳ баҳсларида рўбарў келишига аниқлик киритилди.
Эътиборли жиҳати, 16 ёшгача бўлган ўғил болалар ўртасидаги 1 – Осиё чемпионати жорий йил 20-30 июль кунлари юртимизда бўлиб ўтиши ва спортчиларимиз «А» гуруҳида Қозоғистон ва Гонконг жамоаларига қарши баҳс олиб бориши ойдинлашди. Мазкур чемпионатда қитъанинг 15 давлат терма жамоалари 4 гуруҳга тақсимланган ҳолда чемпионлик учун мамлакатимиз волейбол майдонларида кураш олиб боради.
Шу ўринда таъкидламоқ лозимки, жорий йил февраль ойида Ўзбекистон волейбол федерациясининг навбатдаги йиғилишида Ўзбекистон Республикаси ички ишлар вазири, генерал лейтенант Пўлат Бобожонов федерация раиси этиб сайланди. Ижроия қўмита таркиби янгиланди. Федерация фаолиятини тубдан такомиллаштириш, ҳудудларда волейбол спорт турини ривожлантириш ҳамда олдинда турган нуфузли мусобақаларда муносиб иштирок этган ҳолда совриндорлар қаторидан ўрин олиш учун «Йўл харитаси» ишлаб чиқилиб, ишчи гуруҳ фаолияти йўлга қўйилди.
Юртимизда илк бор ўтадиган 16 ёшгача бўлган ўғил болалар ўртасидаги 1 – Осиё чемпионатидан олдин тайёргарлик босқичи сифатида 14 давлат терма жамоалари ўртасида CAVA Марказий Осиё зонаси чемпионати ўтказилиши режалаштирилган.
Мазкур нуфузли мусобақада ватанимиз шарафини ҳимоя қиладиган иқтидорли спортчиларни терма жамоага саралаб олиш мақсадида жорий йил 23-29 март кунлари Қашқадарё вилоятида Ўзбекистон чемпионати ташкил этилиши белгиланган.
Эслатиб ўтамиз, шу кунларда эркаклар ва аёллар ўртасидаги Ўзбекистон чемпионати баҳслари Бухоро шаҳрида бўлиб ўтмоқда.
Тўлқин Рўзиев,
ЎзА