“Ўзбекистон фуқаросининг идентификация ID-картаси ва хорижга чиқиш биометрик паспорти амал қилиш муддати тугаганлиги муносабати билан янгисига алмаштириш тартибини такомиллаштириш тўғрисида”ги Президент фармони лойиҳаси regulation.gov.uz порталига кенг жамоатчилик муҳокамасига қўйилди.

Мазкур лойиҳада фуқаронинг идентификация ID-картаси ҳамда хорижга чиқиш биометрик паспортининг амал қилиш муддати тугаганлиги муносабати билан уни янгисига алмаштириш билан боғлиқ хабарномалар юборилишини жорий этиш назарда тутилмоқда.

Шунингдек, Ягона интерактив давлат хизматлари порталидаги шахсий кабинетига боғланган фуқарога идентификация ID-картаси ҳамда хорижга чиқиш биометрик паспортининг амал қилиш муддати тугаганлиги муносабати билан уни янгисига алмаштириш билан боғлиқ хабарномалар юборишни йўлга қўйиш бўйича зарур бўлган ахборот тизимларини ўзаро интеграция қилиш назарда тутилган.

Қолаверса, идентификация ID-картасини олиш юзасидан шакллантирилган талабномаларнинг фуқаролар томонидан давлат божи тўланмаганлиги сабабли ахборот тизимда тугалланмаган ҳолатда бўлиши ва якунламаган талабномаларнинг сони ортиши ҳамда ҳисоботларда нотўғри маълумотлар шаклланиши олдини олиш қайд этилган.

Фармон лойиҳасининг қабул қилиниши аҳолига давлат хизматларини қулай ва осон шаклларда кўрсатиш имконини беради.

Лойиҳада қайд этилишича, 2023 йил 1 июнга қадар фуқаронинг идентификация ID-картаси ҳамда хорижга чиқиш биометрик паспортининг амал қилиш муддати тугаганлиги муносабати билан уни янгисига алмаштириш билан боғлиқ хабарномалар белгиланган тўловлар асосида Mobil-ID тизими орқали идентификацияланган мобиль телефон рақамига ёки Ягона идентификация тизими ҳамда Ягона интерактив давлат хизматлари порталидаги шахсий кабинетига боғланган мобиль телефон рақамига СМС-хабар шаклида юборилиши таъминланади.

Бунда СМС-хабарномалар Электрон ҳукуматнинг Ягона хабардор қилиш тизими орқали юборилади.

ЎзА