“Анадолу” агентлигининг Туркия фавқулодда вазиятлар департаментига таяниб хабар беришича, зилзила қурбонлари 35 минг 400 кишига етди.
Минтақада қутқарув-қидирув ишлари тўхтовсиз давом этмоқда. Кеча Қаҳрамонмарашда уч аёл вайроналар ичидан олиб чиқилди. 74 ёшли Жамила Кекеч ва унинг 42 ёшли қизи Малика Имомўғлу зилзиладан 227 соат, 46 ёшли Эмина эса 222 соатдан сўнг қутқарилди.
Мамлакатнинг “TRT 1”, “ATV”, “FOX”, “Kanal D”, “Kanal 7”, “Show TV”, “Star TV” ва “TV8” каналлари биргаликда хайрия марафони ташкил этишди. “Туркия бир юрак” номли акцияда кеча кун давомида 115 миллиард 146 миллион 528 минг лира (тахминан 6 миллион доллар) тўплашга эришилди. Тўғридан тўғри эфир 213 маҳаллий телевидение ва 562 радио орқали намойиш этилиб, эшиттиришлар уюштирилган.
Буюк миллат мажлиси (парламент) раиси Мустафа Шентоп ҳайрия компанияси ўтказаётган телевидениега телефон қилиб, беш ойлик маошини жабрдийдаларга ёрдам бериши учун бағишлаганини маълум қилди.
Жаҳон соғлиқни сақлаш ташкилотининг Европа бюроси раҳбари Ханс Клюгенинг Туркия ҳукумати маълумотларига таяниб, мамлакат касалхоналарида зилзиладан зарар кўрган 80 минг киши даволанаётганини маълум қилган. У жаҳон ҳамжамиятига мурожаат қилиб, кечиктирилмасдан дори-дармонлар учун 43 миллион доллар зарурлиги ҳақида гапирган.
Туркия адлия вазири Бекир Боздаг сўнгги кунларда зилзила содир бўлган минтақаларда йиқилган уйлар, магазинлар ва бошқа жойларда ўғирлик содир этган 75 воқеа қайд этилгани хабарини берди. Сўнгги кунларда 57 шахс қўлга олинган.
Фавқулодда вазиятлар департаментининг маълумотига кўра, 14 февралдан бошлаб, чет эллик қутқарув-қидирув гуруҳлари зилзила минтақасидан чиқиб кетаётганликлари тўғрисида хабар қилди.
Аброр ХОН, ЎзА