Ҳуқуқни муҳофаза қилиш органлари билан ҳамкорликда юртимизда дори воситаларининг ноқонуний айланмасига қарши кураш ва унинг олдини олишга қаратилган қатор тадбирлар амалга оширилмоқда.
Жорий йилнинг январь ойида Дори воситалари, тиббий буюмлар ва тиббий техника экспертизаси ва стандартлаштириш Давлат марказига келиб тушган 133 та мурожаат асосида тақдим қилинган фармацевтика маҳсулотлари ўрнатилган тартибда лаборатория текширувидан ўтказилди. Бу ҳақда Давлат маркази матбуот хизмати хабар берди.
Таҳлил натижаларига кўра, 568 турдаги 10 минг 2 ўрам, жумладан, 100 турдаги 2 минг 115 ўрам давлат рўйхатидан ўтган, 200 турдаги 3 минг 500 ўрам давлат рўйхатидан ўтмаган, 20 турдаги 318 ўрам мувофиқлик сертификати мавжуд, 200 турдаги 3 минг 500 ўрам мувофиқлик сертификати мавжуд бўлмаган, 25 турдаги 319 ўрам ёрлиқлаш кўрсаткичи бўйича ғайриқонуний нусха, 20 турдаги 115 ўрам яроқлилик муддати тугаган, 3 турдаги 135 ўрам қалбакилаштирилган фармацевтика маҳсулотларига тиббиёт амалиётида қўллаш мумкин эмаслиги бўйича хулоса берилди. Чора кўриш мақсадида маълумотлар тегишли органларга тақдим қилинди.
ЎзА