Жорий йил кўпгина спорт турлари қатори футбол жамоалари, хусусан, аёллар футболи учун ҳам «Париж-2024» Олимпиадаси йўлланмаларини сарҳисоб қилиш палласи бўлиши билан аҳамиятлидир.
Айтиш лозим, «Париж-2024» Олимпиадасида аёллар футболи учун Осиё қитъасига иккита ўрин ажратилган. Хўш, ушбу ўринлар тақсимоти қандай бўлади? Жамоалар Олимпиада йўлланмалари учун қай тартибда кураш олиб боради?
Осиё футбол конфедерацияси «Париж-2024» Олимпия саралаш тизимини эълон қилди.
Унга кўра, қитъа аёллар футболи рейтингида кучли бешликда бораётган Шимолий Корея, Япония, Австралия, Хитой ва Жанубий Корея жамоалари Олимпия йўлланмалари учун курашга иккинчи босқичдан қўшилади.
Осиё саралашининг биринчи босқичи учун қуръа ташлаш маросими жорий йил 12 январь куни бўлиб ўтади.
Осиё футбол конфедерациясининг Куала-Лумпурдаги штаб квартирасида биринчи давра учун ўтадиган қуръа ташлаш маросимида қитъа рейтингида 6-30-ўринларни эгаллаган жамоалар, шунингдек, рейтингга кирмаган битта жамоа иштирок этади.
Биринчи саватда 6-12-ўринларни эгаллаган Вьетнам, Хитой Тайпейи, Таиланд, Мянма, Ўзбекистон, Филиппин ва Ҳиндистон жой олса, иккинчи саватдан 13-19-ўринларни эгаллаган Эрон, Иордания, Гонконг, Индонезия, Непал, Қирғизистон ва Мўғулистон ўрин олади. Учинчи саватни 20-26-ўрин соҳиблари Фаластин, Сингапур, Туркманистон, Бангладеш, Ливан, Тожикистон ва Тимор ташкил этади. Тўртинчи саватда 27-30-ўринларда бораётган Шри-Ланка, Малдив ороллари, Покистон, Бутан ва рейтингсиз Афғонистон жамоаси кўриниш беради.
Жамоалар тўрттадан иборат бешта гуруҳга ва учтадан иборат иккита гуруҳга бўлинади ва жорий йил 3-11 апрель кунлари марказлашган майдонда битта давра лигаси форматида рақобатлашади.
Ушбу турда ҳар бир гуруҳ ғолиблари иккинчи босқичга йўл олади ва Осиё рейтингининг энг яхши бешта жамоаси – Шимолий Корея, Япония, Австралия, Хитой ва Жанубий Корея билан кейинги босқич масаласини ҳал этади.
Иккинчи раунднинг гуруҳ ғолиблари ва энг яхши 2-ўринни эгаллаган жамоалар учинчи раундда учрашадилар. Айнан ушбу босқичда жамоалар уй ва чиқиш учрашувларини ўтказадилар. Саралашдан муваффақиятли ўтган тўртта жамоанинг иккита ғолиб жамоаси 2024 йилги Париж Олимпиадасига йўлланмаларни қўлга киритади.
Эслатиб ўтамиз, аёллар футболи бўйича Олимпия ўйинлари мусобақалари 1996 йилдан бери ўтказиб келинади.
Т. Рўзиев, ЎзА