Фарғона шаҳридаги вилоят театр-концерт саройида Ўзбекистон ва Корея ўртасидаги дипломатик муносабатлар ўрнатилганининг 30 йиллиги ҳамда корейс миллати вакиллари Ўзбекистонга жойлашганлигининг 85 йиллигига бағишланган маданий тадбир бўлиб ўтди.
Корея Республикаси Инчхон метрополия-шаҳри ҳокимининг барқарор ривожланиш ҳамда сиёсий масалалар бўйича ўринбосари Хэн Сук Ли бошчилигидаги делегация билан бирга Фарғонага ташриф буюрган «Korean Pops Orchestra» жамоаси фарғоналиклар учун катта концерт дастурини намойиш этди.
Тадбирда сўзга чиққан вилоят ҳокими Хайрулло Бозоров Корея Осиё-Тинч океани минтақасида Ўзбекистон мустақиллигини биринчи бўлиб тан олган давлат эканига эътибор қаратиб, ҳамкорлик алоқалари сўнгги даврда янги босқичга кўтарилганини қайд этди. Кореянинг «Korean Pops Orchestra» жамоаси ижросидаги куй-қўшиқлар нафақат йиғилганлар, вилоятда яшаётган 5 минг 600 нафардан зиёд корейс миллатига мансуб фуқароларни ҳам хурсанд қилди. Ўзбек эстрадасининг ёш ёрқин юлдузлари – Камрон Мамадалиев, Ноила Ҳабибуллаева ва Шаҳноза Ёқубжонова ижросидаги “Ҳеч кимга бермаймиз сени, Ўзбекистон” қўшиғи бугунги Ўзбекистон-Корея маданияти байрамига алоҳида зеб берди.
М.Сулаймонов, ЎзА