Ҳудудларни жадал ижтимоий-иқтисодий ривожлантириш ҳамда тадбиркорлар, шу жумладан, чет эл ва маҳаллий инвесторларга қулай муҳит яратишда кичик саноат зоналари фаолияти муҳим аҳамият касб этмоқда.

Прокуратура органлари томонидан кичик саноат зоналарини ривожлантириш ва бу борадаги қонун ҳужжатлари ижросини таъминлаш бўйича қатор тадбирлар амалга оширилмоқда.

Бевосита прокурорлар томонидан кичик саноат зоналаридаги тадбиркорларнинг 1 минг 159 тасига кўмак кўрсатилди.

Жумладан 583 тасига муҳандислик тизимларига уланишда, 38 тасига 213 миллиард сўмлик кредит, 44 тасига 12 гектар ер майдони ва 10 тасига бино ажратилишида, 21 тасига лицензия ва рухсатномалар берилишида, 17 тасига 7,1 миллиард сўмлик ишлаб чиқарган маҳсулотларини сотишда ҳамда 252 тасига бошқа масалаларда амалий ёрдам кўрсатилди.

Шунингдек, 186 лойиҳага ташаббускорлар аниқланиб, 157 тасининг фаолияти янгидан йўлга қўйилиши натижасида мингдан зиёд иш ўрни яратилди.

Ўтказилаётган назорат тадбирларида аниқланаётган қонун бузилиши ҳолатларига тегишли муносабат билдирилиб, уларни бартараф этиш юзасидан 150 дан ортиқ прокурор назорати ҳужжатлари қўлланилди ва 548 нафар тадбиркорнинг бузилган ҳуқуқлари тикланди.

Бош прокуратура матбуот хизмати хабарига кўра, саноат зоналари иштирокчиларининг ҳуқуқий ҳимоясини таъминлаш борасида қатъий ва тизимли назорат ўрнатилган ҳолда тегишли чора-тадбирлар давом эттирилмоқда.

ЎзА