Халқаро олимпия қўмитаси 2024 йили Франция пойтахти Парижда ўтадиган ёзги Олимпия ўйинларининг бокс мусобақалари учун янги саралаш тизимини эълон қилди.
Бу ҳақда insidethegames.biz сайти маълум қилди.
Унда айтилишича, Халқаро олимпия қўмитаси ижроия кенгаши жаҳон боксчилари келаси йили континентал спорт мусобақаларида квоталар учун кураш олиб борадиган тизимнинг қайта кўриб чиқилган версиясини ратификация қилди.
Унга кўра, 2023 йили Сантягода ўтадиган Пан Америка ўйинлари, Краковдаги Европа ўйинлари, Соломон оролларида бўладиган Тинч океани ўйинлари ҳамда Хитойнинг Ханчжоу шаҳрида кечадиган ёзги Осиё ўйинлари «Париж-2024» олимпиадаси учун саралаш вазифасини ўтайди.
Шунингдек, ХОҚ расмийлари Африка миллий олимпия қўмиталари ассоциацияси билан 2023 йилги Африка ўйинларидаги бокс мусобақаларини “қора қитъа” чарм қўлқоп усталари учун саралаш тадбирига айлантириш бўйича музокаралар олиб борилаётганлигини билдирди.
Халқаро олимпия қўмитаси келгуси йилги қитъавий мусобақалардан кейин «Париж-2024» олдидан айнан 2024 йили иккита жаҳон саралаш турнирини ўтказиш дастурлари тайёрланаётганлигини маълум қилди.
«Париж-2024» ўйинларининг бокс мусобақалари учун янги тизимни тасдиқлаш ХОҚнинг махсус комиссиялари иштирокида, лекин Халқаро бокс ассоциацияси қатнашувисиз амалга ошади.
ХОҚ спорт директори Кейт Макконнеллнинг таъкидлашича, миллий федерациялар, спортчилар, мураббийлар ва техник амалдорлар аввалги малака модели ҳақида баъзи хавотирларни билдиришган. Лекин «Париж-2024» учун жорий этилаётган янги тизим «Токио-2020» олимпиадасига қараганда унчалик мураккаб эмас ва 2023 йилгача бўлган минтақавий бокс мусобақаларига ва 2024 йилда назарда тутилган иккита якуний олимпия саралаш турнирларига асосланган.
Маълумотда айтилишича, «Париж-2024» бокс мусобақаларига тайёргарлик кўриш, саралашларни ўтказиш ҳамда олимпиададаги бокс мусобақаларини бошқариш комиссиясига ХОҚ аъзоси Халқаро гимнастика федерацияси президенти Мауринари Ватанабе раҳбарлик қилади.
Эслатиб ўтамиз, келгуси йилги Европа ўйинлари 21 июнь-2 июль кунлари, бир йилга кечиктирилган. Ханчжоудаги Осиё ўйинлари 2023 йилнинг 23 сентябрь-8 октябрь кунлари, Пан Америка ўйинлари 20 октябрь-5 ноябрь, Тинч океани ўйинлари эса 2023 йилнинг 19 ноябрь-2 декабрь кунлари бўлиб ўтиши режалаштирилган.
Тўлқин Рўзиев, ЎзА