Сенат ялпи мажлисида халқаро ҳамкорлик, нуфузли халқаро ташкилотлар билан Сенат ўртасидаги алоқалар ривожланаётгани қайд этилди.
Маълумки, яқинда мамлакатимизга бир қатор халқаро ташкилотлар раҳбарлари ташриф буюрди. Уларни давлатимиз раҳбари қабул қилди ва ўзаро ҳамкорликни янада мутаҳкамлаш билан боғлиқ масалалар муҳокама қилинди.
Сенат Раиси Танзила Норбоева ЕХҲТнинг амалдаги раиси, Польша Республикаси ташқи ишлар вазири Збигнев Рау ҳамда БМТ Бош котибининг биринчи ўринбосари Амина Муҳаммад билан учрашди.
Мулоқот давомида ушбу тузилмалар билан истиқболдаги режалар ва лойиҳалар ҳам муҳокама қилиниб, ҳамкорлик алоқаларини келгусида янада мустаҳкамлашга келишиб олинди.
Ўтган ҳафтада Ўзбекистон делегацияси Женевада бўлиб ўтган Халқаро меҳнат конференциясининг 110-сессиясида иштирок этди.
– Халқаро меҳнат ташкилоти раҳбари Гай Райдер билан бўлган учрашувда у Президентимиз ташаббуси билан амалга оширилаётган ислоҳотлар ХМТнинг ратификация қилинган конвенциялар тамойиллари ва талаблари билан айнан мослигини таъкидлади, – деди Т.Норбоева. – Ўзбекистон билан ҳамкорликдаги лойиҳаларни амалга ошириш орқали амалий алоқаларни давом эттиришдан манфаатдор эканини қайд этди. Делегациямиз Халқаро интеллектуал мулк ташкилоти бош директори Д.Танг билан ҳам учрашди. Бош директор 2022 – 2026 йилларда Ўзбекистон Республикасида интеллектуал мулк соҳасини ривожлантириш стратегияси билан диққат билан танишганини ва бу давлат раҳбарининг мазкур соҳага қанчалик устувор аҳамият бераётганинг ёрқин мисоли дея, баҳолади.
Сессия доирасида “Аёлларнинг иқтисодий имкониятларини ва уларнинг қарорлар қабул қилишдаги иштирокни кенгайтириш: миллий, минтақавий ва халқаро миқёсдаги тажрибалар” мазусида баҳс-мунозара ташкил этилган. Хорижий давлатлар ҳамда халқаро ташкилотларнинг 70 дан ортиқ вакиллари иштирок этган тадбирда Ўзбекистонда хотин-қизларни қўллаб-қувватлаш, гендер тенгликни таъминлаш ҳамда уларнинг жамият ҳаётининг барча жабҳаларида фаоллигини таъминлаш борасида олиб борилаётган амалий ишлар билан таништирилди.
Шунингдек, делегация ХМТнинг янги сайланган бош директори Жилъберт Унгбо билан учрашди. Ташкилот билан ҳамкорликда энг нозик масалалар бўйича ҳам сезиларли натижаларга эришилгани алоҳида қайд этилди. Ташкилотнинг янги раҳбари Ўзбекистонда амалга оширилган кенг кўламдаги ишлар ва амалий ҳамкорлик албатта ўз натижаларини беради, дея ишонч билдирган.
Мажлисда навбатдаги учрашув Параламентлараро кенгаш бош котиби М.Чунгонг билан бўлиб ўтиши айтиб ўтилди. Шу йил сентябрь ойида Ўзбекистонда бўлиб ўтадиган Парламентлар спикер-аёлларининг 14-саммитини юқори даражада ўтказишга тайёргарлик бошлаб юборилган. Унда дунёнинг 61 нафар аёл-спикерларидан 50 нафари иштирок этиши кутилмоқда.
Н.Абдураимова,
ЎзА