Búgingi kúnde jaslar arasında elektron sigaretalardı paydalanıw artıp barmaqta. Ashınarlısı, mektep oqıwshıları hám qızlar da bul zıyanlı qurallardan paydalanbaqta. Tallawlarǵa bola, elektron sigaretalardan paydalanıwshı 18-29-jastaǵı jaslar 32 mıńnan aslam.

Búgin 20 mıńǵa shamalas ul balalar hám mıńǵa shamalas qız balalar shegiwge beyimli, 12 mıńnan aslam balalar hám jas óspirimler bul sigaretalardı turaqlı shegedi.
2021-2023-jıllarda mámleketimizge bahası 28,5 million dollarlıq 5 million 400 mıń dana elektron sigaretalar sırt elden import etilgen bolıp, bul kórsetkish aldınǵı jıllarǵa salıstırǵanda 80 esege artqan.
Kópshilik elektron sigaretalardıń zıyanı azıraq dep oylaydı. Biraq onıń quramındaǵı nikotin suyıqlıǵınıń insanǵa unamsız tásiri narkotik zattan da kóbirek. Еlektron sigaretalar organizmde nikotinge ǵárezlilikti arttıradı, balalar hám jas óspirimlerde miy rawajlanıwına, intellekt, bilim hám qábilettiń azayıwına, ruwxıy agressivlik rawajlanıwına alıp keledi.
Sonday-aq, bronx-ókpe sistemasında záhárleniw, astma, bronxit, ólimge alıp keletuǵın ayaz, rakti keltirip shıǵarıwı múmkin. Oraylıq nerv sisteması, búyrek hám bawır funkciyasınıń buzılıwı, sonday-aq, gipertaniya, insult, infarkt sıyaqlı júrek-qan tamır kesellikleriniń rawajlanıwına alıp keledi.
Búgingi kúnde dúnyanıń 37 mámleketinde elektron sigareta aylanısı qadaǵan etilgen. Atap aytqanda, Norvegiya, Iran, Irak, Túrkiya, Singapur, Túrkmenstan, Qazaqstan, Qırǵızstan, Belgiya sıyaqlı mámleketlerde elektron sigaretalardı satıw qadaǵan etilgen.
Endi Ózbekstanda da elektron sigaretalardıń aylanısına shek qoyıw, qadaǵan etiw máselesi nızam dárejesinde bekkemlenbekte. Oliy Majlis Nızamshılıq palatasınıń májilisinde elektron sigaretalardıń aynalısın qadaǵan etiw hám juwapkershilik belgilewge qaratılǵan nızam joybarı birinshi oqıwda qabıl etildi.
Oliy Majlis Nızamshılıq palatasınıń deputatı Noiba Inoyatova usı nızam joybarınıń áhmiyeti hám onda názerde tutılıp atırǵan normalar haqqında aytıp ótti:
– Búgin elektron sigaretalardı paydalanıp atırǵan jaslar arasında qızlardıń da bar ekenligi ashınarlı. Joybar menen elektron sigaretalardıń aylanısı qadaǵan etilmekte hám bul tártipti buzǵanı ushın tiyisli juwapkershilik kórsetilmekte. Nızam joybarınıń qabıl etiliwi millet genofondın saqlaw, keleshek áwlad wákilleriniń salamatlıǵın támiyinlewde úlken áhmiyetke iye, – deydi deputat.

Muhtarama Komilova, Doniyor Yoqubov, Anvar Ahmedov (video), ÓzA