Ámiwdárya rayonı Xolimbet awılında jasawshı Erkin Qoshaevtı jerdiń tilin bilgen miynet súygish insan desek aljaspaymız. «Úlgili qıytaq jer iyesi» kókirek belgisi menen sıylıqlanǵan ol úy qaptalındaǵı qıytaq jerden ónimli paydalanıp, qıstıń ayazlı kúnlerinde de mol ónim jetistirip, shańaraǵına dáramat tappaqta.
Ol qıytaq jerinde limon, qulpınay, arab qurması sıyaqlı miywelerdi jetistiriwdi jolǵa qoyǵan bolıp, 30 sotıx egin maydanınıń 2 sotıxında ıqsham ıssıxana qurıp, onda jetistirilgen limonnan bir jıl ishinde ekinshi márte ónim alınbaqta. Rayonlıq fermer, diyxan xojalıqları hám qıytaq jer iyeleri keńesi tárepinen limon nállerin kóbeytiwdi jolǵa qoyıw boyınsha jol-jobalar berilip, ámeliy járdemler kórsetilip kelinbekte. Qıstıń ayazlı kúnlerinde qarıydarlardıń limon ónimine degen talabı jaqsı bolǵanlıqtan qıytaq jer iyesiniń ónimnen alǵan paydası shańaraǵına qosımsha dáramat bolmaqta.

Qaraqalpaqstan xabar agentligi