Futbol boyınsha 20 jasqa shekemgi jaslar arasındaǵı Aziya kubogine tayarlanıp atırǵan Ózbekstan saylandı komandası búgin Tashkent qalasında óziniń dáslepki oqıw jıyının baslap jiberdi.

Komanda bas treneri Farhad Nishanov oqıw shınıǵıwlarına elimizdiń eń kúshli 26 jas futbolshısın shaqırdı. Quwanıshlı tárepi sonda, olardıń arasında qaraqalpaqstanlı dárwazaman Samandar Muratbaev hám yarım qorǵawshı Muhammedali Reymovlar da bar.
Tashkenttegi oqıw shınıǵıwları juwmaqlanǵannan soń Ózbekstan jaslar saylandı komandası Qatar paytaxtı Dohaǵa ushıp ketedi hám ol jerde 17-yanvar kúni Siriya hám 22-yanvar kúni Qatar U-20 saylandı komandalarına qarsı doslıq ushırasıwların ótkeredi.
Aziya kubogi jarısları bolsa, usı jıdıń 6-fevral kúni Qıtayda baslanadı hám onda Ózbekstan jaslar saylandı komandası ámeldegi chempion sıpatında oyınlarǵa kirisedi. Kubok bellesiwleriniń topar basqıshında komandamızǵa Iran, Indoneziya hám Yemen jaslar saylandı komandaları qarsılas boladı.

Adilbay Orazov,
Qaraqalpaqstan xabar agentligi sholıwshısı