Mámleketimizde qolaylı investiciya ortalıǵın jaratıw, tikkeley investiciyalardı jedel tartıw, sonday-aq, tarawda jumıs islep atırǵan jergilikli hám sırt elli investor hám isbilermenlerdiń huqıqların kepillewge ayrıqsha itibar qaratılmaqta.
Sonıń menen birge, investiciya jumısın tiykarsız tekseriwlerden qorǵawdı kepillew, investorlardıń kepillikleri, huqıqları menen minnetlemeleri hám olardı mámleket tárepinen qollap-quwatlaw, sonday-aq, ámeldegi investiciya nızamshılıǵındaǵı aldınǵı xalıqaralıq standartlar, sonıń ishinde, Jáhán sawda shólkeminiń qaǵıydalarına beyimlestiriw zárúrligi búgingi kúnniń talabı bolmaqta.
«Investiciyalar hám investiciya jumısı haqqında»ǵı nızam usı maqsette islep shıǵılǵan.
Senattıń Xalıqaralıq qatnasıqlar, sırtqı ekonomikalıq qatnasıqlar, sırt elli investiciyalar hám turizm máseleleri komitetiniń májilisinde usı nızam dáslepki túrde dodalandı.
Bul nızam menen investiciyalar hám investiciya jumısına baylanıslı tiykarǵı túsinikler, bul jumıstıń tiykarǵı principleri hám maqsetleri belgilenbekte. Investiciya jumısınıń kepillikleri hám onıń huqıqıy jaqtan qorǵalıwı tártibine salınbaqta.
Atap aytqanda, ádillikli hám teń huqıqlı qatnasıqta bolıw, investiciya jumısın tiykarsız tekseriwlerden qorǵaw, investiciyalaw erkinligi, ashıqlıqtı támiyinlew, biznesti basqarıw erkinligi hám qarjılardı erkin jumsawǵa baylanıslı kepillikler belgilenbekte.
Sonday-aq, «tiykarǵı investiciya joybarı» túsinigi kirgizilip, investiciya kólemine bola kishi, orta, iri, strategiyalıq investiciya joybarlarına nızamǵa muwapıq jeńillikler beriw názerde tutılmaqta.
Investiciyalardı xoshametlew ilajları hám jeńillikler sheńberi keńeytilmekte. Sırt el investiciyalarınıń qatnasıwındaǵı kárxanada ustav fondınıń keminde 15 procenti sırt el investiciyaların qurawı zárúr ekenligi haqqındaǵı ámeldegi norma 10 procentke túsirilmekte.
Májiliste «Ózbekstan Respublikası menen Tájikstan Respublikası arasında awqamlaslıq qatnasıqları haqqındaǵı Shártnamanı (Dushanbe, 2024-jıl 18-aprel) ratifikaciyalaw haqqında»ǵı nızam da dodalandı.
Bul Shártnamaǵa Ózbekstan Respublikası Prezidenti Shavkat Mirziyoevtiń 2024-jıl 18-aprelde Tájikstan Respublikasına mámleketlik saparı sheńberinde Dushanbe qalasında qol qoyılǵan.
Shártnama eki mámleket arasındaǵı doslıq hám strategiyalıq sheriklik qatnasıqların jańa – awqamlaslıq dárejesine alıp shıǵıwǵa qaratılǵan.
Usı hújjet xalıqaralıq huqıq normalarına ámel etken halda regionallıq kelispewshiliklerdi tınısh jol menen sheshiw, mámleketlik shegaralardı demarkaciyalaw boyınsha birge islesiwdi dawam ettiriw, parlamentler arasında parlament diplomatiyasın rawajlandırıw hám óz-ara qatnasıqlardı bekkemlew sıyaqlı baǵdarlardaǵı birge islesiwdi jáne de rawajlandırıwdı názerde tutadı.
Sonday-aq, ekonomikalıq, investiciyalıq, ilim-texnika, mádeniyat, bilimlendiriw, sport hám turizm tarawlarında birge islesiwdi tereńlestiriw, terrorizm, ekstremizm hám transmilliy shólkemlesken jınayatshılıqqa qarsı gúresiw boyınsha birgeliktegi háreketlerdi muwapıqlastırıw da úlken áhmiyetke iye.
Senatorlar, xalıq deputatları jergilikli keńesleriniń turaqlı komissiyalarınıń aǵzaları, qánige hám ekspertler hám ǵalaba xabar qurallarınıń xızmetkerleri qatnasqan májilistiń juwmaǵında komitettiń tiyisli qararları qabıl etildi.
Norgul Abduraimova, ÓzA