Íssıxana – qolaysız klimat sharayatında eginlerge jasalma ortalıq (temperatura, jaqtılıq, ıǵallıq h.b.) jaratatuǵın qurılma bolıp, onda máwsimnen tısqarı dáwirlerde de ónim jetistiriw, náller ósiriwge xızmet etedi.
Sońǵı jıllarda elimizde, sonıń ishinde, respublikamızda ıssıxanalarda ónim jetistiriwge úlken itibar qaratılıp, keń múmkinshilikler jaratılmaqta.
Taqıyatas rayonındaǵı Naymankól mákan puqaralar jıyınında jaylasqan “Nayman agroteplica” juwapkershiligi sheklengen jámiyeti tárepinen shólkemlestirilgen 8,5 gektarlıq jer maydanındaǵı ıssıxanada ovosh ónimleri tárbiyalanbaqta.
Usı ıssıxanadaǵı 8,5 gektar maydanǵa pomidor nálleri egilgen bolıp házirgi waqıtta ónim beriw aldında. Bunday jumıslar, álbette, bazarlarımızda taza pomidor ónimleriniń kóbeyiwine, bahalardıń turaqlılıǵın saqlawǵa tiykar jaratadı.
Isbilermen búgingi kúnde 43 jumıssız puqaranı jumıs penen támiyinlegen. Sonnan otızı hayal-qızlar bolıp esaplanadı.
Sonıń menen birge, isbilermen keleshekte ıssıxana jumısın keńeytiw, jumıs orınların jáne de kóbeytiw niyetinde ekenligin atap ótti.
Á.Jiyemuratov,
Qaraqalpaqstan xabar agentligi