Bizge belgili, 2024-jıldıń 29-yanvar kúni bolıp ótken májiliste Shavkat Mirziyoev Bas ministr Abdulla Aripovqa 2025-jıldan AI-80 markalı benzinnen waz keshiw máselesin úzil-kesil sheshiw boyınsha tapsırma bergen edi.
Prezidenttiń «Ózbekstan-2030» strategiyasın «Qorshaǵan ortalıqtı qorǵaw hám «jasıl» ekonomika» jılında ámelge asırıwǵa baylanıslı mámleketlik baǵdarlama haqqında»ǵı pármanı jámiyetshiliktiń dodalawına qoyıldı.
Pármanǵa bola, 2025-jıl 1-maydan baslap Tashkent hám Nókis qalaları hám wálayat oraylarında tómendegi baǵdarlarda jańa joybarlardı ámelge asırıw qadaǵan etiledi:
• asbest, cement islep shıǵarıw, shlam hám shlaklar;
• teri-ónermentshilik, qusshılıq fabrikaları;
• nátiyjeliligi joqarı bolǵan shań-gaz tazalaw obyektleri menen úskenelenbegen hár qanday túrdegi kómir jaǵıw;
• qara hám reńli metallurgiya zavodları, quramında zıyanlı aralaspalar bar ayna, zıyanlı ximiyalıq elementler menen islew;
• qáwiplilik dárejesi I hám II klasına tiyisli shıǵındılardı qayta islew hám jaǵıw kárxanaları.
Bunnan tısqarı, 2025-jıldıń aqırına shekem Evro – 4 standartınan tómen ekologiyalıq kategoriyadaǵı motor janar mayınan paydalanıw hám satıwdı sheklew usınıs etilgen.
Sonday-aq, respublikanıń barlıq aymaqlarında jaylasqan ıssılıq hám elektr energiyasın islep shıǵarıw kárxanalarına janar may sıpatında mazuttan paydalanıwdı qadaǵan etiw, buǵan Ministrler Kabineti menen kelisilgen halda avariyalıq janar may sıpatında paydalanıw jaǵdayları kirmeytuǵını atap ótilgen.
Esletip ótemiz, Prezident pármanı joybarı boyınsha jámiyetshiliktiń dodalawı 22-yanvarǵa shekem dawam etetuǵını belgilengen.
Qaraqalpaqstan xabar agentligi