Sanlı texnologiyalar ministri Sherzod Shermatov hám Shveycariya birge islesiw hám rawajlanıw agentliginiń Ózbekstandaǵı wákili Andrin Fink Ózbekstanda IT bilimlendiriwin rawajlandırıw, xalıqaralıq birge islesiwdi keńeytiw hám jańa joybarlardı ámelge asırıw máselelerin dodaladı.

Joybardıń dslepki basqıshında xalıqtıń sanlı kónlikpeleriniń jaǵdayı tallanadı, bazar talaplarına sáykes jańa kásipler anıqlanadı. IT bilimlendiriw resursların birlestiriwshi platforma islep shıǵıladı.
Bul haqqında Shveycariyanıń Ózbekstandaǵı elshixanası, Shveycariya rawajlanıw hám birge islesiw agentligi hám IT bilimlendiriw associaciyası arasında «Ózbekstanda IT hám sanlı bilimlendiriw landshaftın rawajlandırıw inklyuziv ósiw ushın mápdar táreplerdi baylanıstırıw» joybarı sheńberinde kelisim shártnamasına qol qoyıldı.
Bul joybar sheńberinde jaslardıń IT sawatlılıǵın arttırıw, mamanlıq arttırıw imkaniyatların beriw, sonday-aq, awıllarda jasaytuǵın jaslar hám hayal-qızlardı jumıs penen támiyinlew názerde tutılǵan.
Joybar keń kólemli izertlewler hám sáykeslendirilgen bilimlendiriw baǵdarlamaların qayta kórip shıǵıw hám rawajlanıp atırǵan taraw talapların qanaatlandırıw ushın qánigeler ushın mamanlıq arttırıwdı óz ishine aladı.
Izertlewge tiykarlanǵan bul kózqaras keyingi basqıshlar haqqında maǵlıwmat berip, beyimlestirilgen hám tásirli almasıwlardı támiyinleydi. Bul maqsetler ushın Shveycariya rawajlanıw hám birge islesiw agentligi tárepinen IT bilimlendiriw associaciyası mámleketlik emes kommerciyalıq emes shólkemine shama menen 2 mlrd. sum (149 655 AQSh dolları) grant qarjıları ajıratıldı.
Joybar sheńberinde aymaqlarda IT sawatlılıǵı hám kózqaraslarınıń boslıqları tallanıp, maqsetli auditoriya sıpatında jaslar, awıl xalqı, hayal-qızlar hám qızlar, kem támiyinlengen shańaraqlar, mayıplıǵı bar shaxslar qamtıp alınadı.

N.Rahmonova, ÓzA