O`zbekistan Respublikası Prezidenti Shavkat Mirziyoev 27-avgust ku`ni Samarqandqa keldi. Ma`mleketimiz basshısı wa`layatqa sapar etiwin Birinshi Prezidentimiz Islam Ka`rimovtın` qa`birin zıyarat etiwden basladı.

Shavkat Mirziyoev Islam Ka`rimovtın` qa`birine gu`l qoydı. Quran oqıldı.

Ma`mleketimiz basshısının` 2017-jıl 25-yanvar`dag`ı «O`zbekistan Respublikasının` Birinshi Prezidenti Islam A`bdig`anievich Ka`rimovtın` esteligin ma`n`gilestiriw haqqında»g`ı qararına muwapıq, Samarqand qalasında Islam Ka`rimov jerlengen jerde estelik kompleksi qurılmaqta.

Prezidentimiz 2017-jıl 14-aprel` ku`ni Samarqand wa`layatına sapar etiwi waqtında usı mavzoleydin` joybarı menen tanısıp, onı jetilistiriw boyınsha ko`rsetpeler bergen edi. Sol tiykarda bul jerde u`lken qurılıs ha`m abadanlastırıw jumısları a`melge asırıldı. Mavzoley mramor ha`m granitten qurılg`an, Quran ayatları menen bezelgen. Aywan (terrasa) su`tinlerine Islam Ka`rimovtın` hikmetli so`zleri o`zbek, inglis ha`m arab tillerinde jazılg`an. Komplekstin` a`tirapı ken`eytilip, zıyaratshılar ushın barlıq qolaylıqlar jaratılg`an. Birinshi Prezidentimizdin` mavzoleyi Ha`zireti Qızır meshiti menen u`ylesip ketken.

Shavkat Mirziyoev komplekstegi qurılıs ha`m abadanlastırıw jumısların juwmaqlaw, zıyaratshılar ushın sharayatlardı bunnan bılay da  jaqsılaw, qoyımshılıqtı abadanlastırıw boyınsha usınıslar berdi.

Sol ku`ni Prezidentimiz Imam Buxariy kompleksinde boldı. O`tkenlerdin` esteligi yadqa alınıp, Quran oqıldı.

Ma`mleketimiz basshısının` Imam Buxariy estelik kompleksinin` janında islam ma`deniyatına, ulıwmainsanıylıq tsivilizatsiyanın` rawajlanıwına sheksiz u`les qosqan ullı babalarımızdın` ko`p qırlı bay miyrasın u`yreniwge qa`nigelesken xalıqaralıq ilimiy-izertlew orayın sho`lkemlestiriw baslaması elimiz ha`m xalıqaralıq ja`miyetshiligk ta`repinen ken`nen qollap-quwatlandı.

Tez arada bul joybardı a`melge asırıw boyınsha qurılıs jumısları baslap jiberildi.

Prezidentimizdin` usı jıl 21-may ku`ni Saud Arabstanına sapar etiwi shen`berinde  O`zbekistan Respublikası menen Islam rawajlanıw banki arasında Imam Buxariy xalıqaralıq ilimiy-izertlew orayın sho`lkemlestiriw haqqında Tu`sinisiw memorandumına qol qoyıldı.

Bu`gingi ku`nde ilimiy-izertlew orayının` qurılısı jedel dawam etpekte. Orayda zamanago`y oqıw imaratları, kitapxana, jataqxana, asxana ha`m basqa da za`ru`r ob`ektler qurıladı. Imam Buxariy ilimiy-izertlew orayı usı bag`dardag`ı basqa da ag`artıwshılıq orınların birlestiretug`ın iri oray boladı.

Shavkat Mirziyoev bul jerde a`melge asırılıp atırg`an do`retiwshilik jumısları menen tanıstı.

Ma`mleketimiz basıshısı oraydı zamanago`y tu`rde qurıw menen birge, onı ruwxıy mazmun menen ja`ne de bayıtıw, ullı babalarımızdın` miyrasın u`git-na`siyatlaw, jawızlıqqa qarsı ag`artıwshılıq penen gu`resiw za`ru`rligin atap o`tti.

Bul jerge kelgen adamlar tek g`ana zıyarat etiw menen sheklenip qalmastan, ilim-bilim alsın. Basqa ma`mleketlerden de talabanlar kelip oqısın. Bul ushın teren` ilimiy metodika jaratıw, dinimizdin` negizgi ma`nisin u`yretiw kerek, dedi Shavkat Mirziyoev.

Usı jerde Samarqand qalasının` Dahbed ko`shesinen Payariq rayonındag`ı Imam Buxariy kompleksine alıp baratug`ın Nurafshon ko`shesin abadanlastırıw, jol boyında zamanago`y turaq jaylar, sawda ha`m turmıslıq xızmet ko`rsetiw ob`ektlerin qurıw joybarları boyınsha mag`lıwmat berildi.

Anvar SAMADOV,

G`olib HASANOV,

O`zA nın` arnawlı xabarshıları