Ózbekstan musılmanları mákemesi basqarması tárepinen shólkemlestirilgen «Quran jarısı»nıń Tashkent qalası Studentler qalashasındaǵı «Jaslar orayı»nda 21-24-aprel kúnleri (erler) arasında ótkerilgen Ózbekstan Respublikalıq basqıshında jerleslerimiz ılayıqlı túrde qatnasıp, aldıńǵı orınlardı iyelewge miyasar boldı.

Onda Qaraqalpaqstan Respublikası, Tashkent qalası hám wálayatlarda jeńimpaz bolǵan puqaralar óz bilimlerin kórsetip, kúsh sınastı. Jarıs «hifz» – qurandı tolıq yadtan biletuǵın hám «tilawat» – qurandı sulıw etip oqıytuǵın qarıylar arasında bolıp ótti.

Jeńimpazlar anıqlanıp, 18-25 jastaǵı er adamlar arasında tilawat jónelisi boyınsha jerlesimiz Nurmuhammed qarıy Ametniyazov úshinshi orındı iyeledi. Al, Diniy bilimlendiriw mákemeleriniń studentleri arasında ótkerilgen jarısta «tilawat» jónelisi boyınsha Muhammad al-Beruniy orta arnawlı islam bilim jurtınıń studenti Hamidullah qarıy Hikmatullaev ekinshi, «hifz» jónelisi boyınsha Taqıyatas rayonınan barıp Tashkent islam institutında oqıp atırǵan Joldasbay qarıy Nuriddinov birinshi orındı iyeledi.

Usı Quran jarısınıń ulıwma jeńimpazı da – Joldasbay qarıy Nuratdinov dep tabılıp, oǵan eń joqarǵı sıylıq bolǵan Prezident sawǵası – «Lacetti» avtomashinası tapsırıldı. Sonday-aq, tilawat jónelisi jeńimpazlarına eki adamlıq, hifz jónelisi jeńimpazlarına úsh adamlıq umra saparı sertifikatları hám qáwenderlerdiń túrli sawǵaları berildi.

Á.Jiyemuratov,

Qaraqalpaqstan xabar agentliginiń xabarshısı.