«Pasport Index» xalıqaralıq pasport bekkemligi reytingi járiyalandı. Ol 96 mámleket arasında dúzilgen bolıp, Ózbekstan 68-orındı bánt etken.

Dúnya pasportları reytingi puqaralardıń túrli mámleketlerge vizasız yaki ápiwayılastırılǵan tártipte kiriw imkaniyatlarına tiykarlanadı. Bul reyting nátiyjelerine bola, eń kúshli pasport Birlesken Arab Ámirlikleri (BAÁ) puqaralarına tiyisli. Olar 133 mámleketke vizasız, jáne 47 mámleketke vizanı kelgende alıw arqalı kiriw imkaniyatına iye.
Siriyanıń pasportı bolsa dúnyadaǵı eń ázzi pasport sıpatında atap ótilgen. Bul mámlekettiń puqaraları tek ǵana 9 mámleketke vizasız kiriwi, jáne 31 mámleketke kelgende vizanı alıw imkaniyatına iye.
Ózbekstan puqaraları 29 mámleketke vizasız barıwı, 46 mámleketke barǵanda viza rásmiylestiriwi, úsh mámleketke bolsa aldınnan ruxsatnama menen barıwı múmkin. 120 mámleketke barıw ushın ulıwma belgilengen tártipte kiriw vizası talap etiledi.
Ózbekstan pasportı dúnya reytinginde eki tekshe kóterildi, ulıwma kórsetkish bolsa 73 ten 78 ge jetti. Sonıń ishinde, 2024-jılı BAÁ, Tailand, Oman, Pakistan menen vizasız rejim engizildi, sonday-aq, Qıtay menen ámelge asırılıwı rejelestirilgen.

Qaraqalpaqstan xabar agentligi