Nókis áskeriy garnizonınıń Oficerler úyinde «Úlgili ásker shańaraǵı» tańlawınıń okruglik basqıshı bolıp ótti.
«Bekkem shańaraq-jámiyet tayanıshı» súreni astında ótkerilgen ilajǵa áskeriy bólimler kóleminde ótkerilgen jarısta jeńimpaz bolǵan 6 shańaraq qatnastı.
Tańlaw qatnasıwshıları birinshi basqıshta ózlerin tanıstırıw, ekinshi basqıshta náshebentlik, ishiwshilik, terrorizm, adam sawdası, jaqın aǵayinler arasında neke sıyaqlı búgingi kúnniń áhmiyetli mashqalaların ózinde sáwlelendirgen saxnalıq kórinis, sońǵı soraw-juwap basqıshında ózleriniń bilim jáne ónerlerin kórsetti.
Tóreshiler quramı tárepinen eń joqarı ballǵa miyasar bolǵan Juraevlardıń shańaraǵı birinshi orındı iyelep, kelesi basqıshqa jollama aldı. Sonday-aq, «Eń balajan áskeriy shańaraq», «Eń múnásip erli-zayıplı áskeriy shańaraq», «Eń bilimli áskeriy shańaraq», «Eń tatıw áskeriy shańaraq», «Eń quwnaq áskeriy shańaraq» nominaciyaları boyınsha da jeńimpazlar anıqlandı.
-Hár qanday kásip sıyaqlı áskeriy xızmette de shańaraqtıń tatıwlıǵı ayrıqsha orın iyeleydi,-deydi tańlaw jeńimpazı, kishi serjant Umid Juraev.-Usı kózqarastan qaraǵanda áskeriy xızmetkerlerdiń shańaraqları arasında dástúriy tárizde ótkerilip kiyatırǵan bul ilajdıń tárbiyalıq áhmiyeti úlken. Mine, 14 jıldan beri áskeriy xızmetimdi atqarıp kiyatırman. Ótken jılı úshinshi dárejeli «Úlgili xızmetleri ushın» kókirek belgisi menen sıylıqlandım. Bunda shańaraq aǵzalarımnıń da múnásip úlesi bar.
Ilaj jeńimpazı menen barlıq qatnasıwshılar Arqa-Batıs áskeriy okrugi tárepinen Diplom hám bahalı sawǵalar menen sıylıqlandı.
Esletip ótemiz, bul tańlaw Ózbekstan Respublikası Prezidentiniń 2018-jıl 2-fevraldaǵı «Ózbekistan Respublikası Prezidentiniń «Hayal-qızlardı qollap-quwatlaw hám shańaraq institutın bekkemlew tarawındaǵı jumısın túp-tiykarınan jetilistiriw ilajları haqqında»ǵı Pármanınıń orınlanıwın támiyinlew, sonday-aq, Arqa-Batıs áskeriy okruginiń tiykarǵı ilajlar rejesine muwapıq ótkerildi.
D.ABIBULLAEV,
Qaraqalpaqstan xabar agentliginiń xabarshısı.