Arqa-Batıs áskeriy okrugi áskerleri tárepinen Eslew hám qádirlew kúni aldınan respublikamızdaǵı bir qatar qoyımshılıqlarda abadanlastırıw jáne qayır-saqawat ilajları ótkerildi.


Ózbekstan Respublikası Prezidentiniń 2018-jıl 16-apreldegi «Eslew hám qádirlew kúnine tayarlıq kóriw hám onı ótkeriw haqqında»ǵı qararınıń orınlanıwın támiyinlew baǵdarında respublikamızda «Insan qádiri ullı, eslew muqaddes», «Mártlik, parız hám sadıqlıq» súrenleri astında keń kólemli ilajlar ótkerilmekte. Qararda atap ótilgenindey, Eslew hám Qádirlew kúniniń keńnen belgileniwin támiyinlew mámleketlik hám mámleketlik emes shólkemlerdiń birinshi gezektegi wazıypası, barlıq Ózbekstan puqaralarınıń hújdanlıq háreketi hám dástúriy minnetlemesi dep belgilendi.


-Nókis qalasındaǵı «Sálmen ata», «Shorsha baba», «Orazımbet axun», «Aqbaslı» hám xristianlar qoyımshılıqlarında 800 ge shamalas ásker abadanlastırıw jumıslarına qatnastı,-deydi Arqa-Batıs áskeriy okrugi sárkardasınıń orınbasarı wazıypasın waqtınsha atqarıwshı Alisher Shirinov.-Bunnan tısqarı, áskerlerimiz Qońırat rayonı «Ádebiyat» awıl puqaralar jıyını aymaǵındaǵı «Dawıt ata», Nókis rayonı «Taqırkól» awıl puqaralar jıyını aymaǵındaǵı «Dosımbet ata» qoyımshılıqlarında da abadanlastırıw jumısların alıp bardı. Usı kúni «Sálmen ata» qoyımshılıǵına 400 mıń sum muǵdarında qayırqomlıq qarjısı tapsırıldı.


Búgingi kúni elimizdiń qorǵanıw qábiletin bekkemlew, jaslardı Watandı súyiwshilik ruwxında tárbiyalaw, armiyanıń hám xalıqtıń birligin támiyinlew baǵdarında keń kólemli reformalar ámelge asırılmaqta. Solay eken, áskeriy xızmetkerlerdiń búgingi tınısh hám abadan kúnler ushın janın pidá etken ata-babalarımızdıń muqaddes esteligin, ótkenlerdiń ruwxın shad etiw, olardıń ibratlı islerin dawam ettiriw maqsetindegi bul qayırlı baslaması hár qanday maqtawǵa hám qollap-quwatlawǵa turarlıq.

D.ABIBULLAEV,

Qaraqalpaqstan xabar agentliginiń xabarshısı.