Burın xabar etilgenindey, Ózbekstan Respublikası Oliy Majlisi Nızamshılıq palatasınıń gezektegi májilisinde elimizde alıp barılıp atırǵan sociallıq-ekonomikalıq reformalardı jetilistiriwge qaratılǵan bir qatar nızam joybarları kórip shıǵıldı.
Rawajlanıwdıń jańa basqıshın hám 2018-jılı Ózbekstan Respublikasınıń sociallıq-ekonomikalıq rawajlanıwın belgilep bergen Ózbekstan Respublikası Prezidentiniń Oliy Majliske Múrájatında mámleketlik xızmetlerdi tikkeley tómengi buwınlarǵa kórsetiw, jergilikli hákimiyat vedomstvoları ushın qarjılay hám basqa da imkaniyatlardı keńeytiw zárúrligi, bar tártip-qaǵıydalardı optimallastırıw hám ápiwayılastırıw, basqarıwdıń innovaciyalıq túrlerin engiziw kerekligi ayrıqsha atap ótilgen edi.
«Rekruting jumısı haqqında» ǵı nızam joybarı deputatlar tárepinen birinshi oqıwda kórip shıǵıldı. Bul nızam joybarı Ózbekstannıń nızamshılıq ámeliyatında birinshi márte, xalıqaralıq miynet shólkeminiń «Jeke menshik bántlik agentlikleri haqqında»ǵı Konvenciyasınıń xalıqaralıq standartların hám rekruting jumısın shólkemlestiriw jáne rawajlandırıwdıń shet el tájiriybesin esapqa ala otırıp, 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasına muwapıq islep shıǵılǵan.
Atap ótilgenindey, nızam joybarında rekruting agentlikleri xızmetleriniń tiykarǵı túrleri kórsetilgen bolıp, jumıs izlep atırǵan shaxslarǵa Ózbekstan Respublikası aymaǵında maqul jumıs tańlaw, jumıs beriwshiler ushın kadrlar tańlaw, shet elde jumıs izlep atırǵan shaxslardı jumısqa ornalastırıw, miynet bazarında málimleme hám másláhát xızmetlerin kórsetiw solardıń qatarına kiredi. Sonday-aq, rekruting xızmetlerin kórsetiw shártnamalarına baylanıslı májbúriy talaplardı belgileytuǵın normalar bar, rekruting jumısı tarawında wákillikli mámleket uyım esaplanatuǵın Ózbekstan Respublikası Bántlik hám miynet qatnasıqları ministrliginiń statusı menen wazıypaları belgilengen.
Nızamnıń qabıl etiliwi Ózbekstan xalqında elimizdiń kárxanalarında, jáne shet elde jumıs penen támiyinlew imkaniyatların qatań túrde kóbeytiw hám keńeytiw, mámleketlik xızmetler hám jeke menshik sektor tárepinen bántlikke kómeklesiw mexanizmlerin anıq tártipke salıw imkaniyatın beretuǵını deputatlar tárepinen atap ótildi. Sonıń menen birge, deputatlardıń atap ótkenindey, jumıs penen támiyinlewge baylanıslı xızmetler kórsetiw tártibin hám sharayatların belgilew, sonıń ishinde, rekruting agentlikleriniń, kárxanalar jáne jumıs izlep atırǵan shaxslardıń huqıqları menen minnetlemelerin belgilew birinshi dárejeli áhmiyetke iye.
Soń Ózbekstan Respublikası Ádillik ministrligi tárepinen Ózbekstan Respublikası Prezidentiniń «Xalıqqa mámleketlik xızmetler kórsetiwdiń milliy sistemasın túp-tiykarınan reformalaw ilajları haqqında»ǵı pármanı jáne «Ózbekstan Respublikası Ádillik ministrligi janındaǵı Mámleketlik xızmetler agentliginiń jumısın shólkemlestiriw haqqında»ǵı qararınıń orınlanıwın támiyinlew maqsetinde islep shıǵılǵan «Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızam joybarı dodalandı.
Pármannıń 4-bántine tiykarlanıp 2018-jıl 1-yanvardan Isbilermenlik subektlerine «bir ayna» principi boyınsha mámleketlik xızmetler kórsetiw birden-bir orayları Mámleketlik xızmetler oraylarına aylandırılǵan. Sonnan kelip shıqqan halda «Puqaralardıń ózin-ózi basqarıw uyımları haqqında»ǵı jáne «Básekilik haqqında»ǵı Ózbekstan Respublikası nızamlarınıń bir qatar statyalarına tiyisli ózgerisler kirgizilmekte.
Sonday-aq, Ózbekstan Respublikasınıń Hákimshilik juwapkershilik haqqındaǵı kodeksine ózgerisler hám qosımshalar kirgizilmekte. Kodeks mámleketlik xızmetler kórsetiw tarawındaǵı nızam hújjetlerin buzǵanlıǵı ushın juwapkershilikti názerde tutatuǵın statya menen tolıqtırılmaqta. Bul statya mámleketlik uyımlar hám basqa da shólkemler tárepinen mámleketlik xızmetler kórsetiwdiń nızam hújjetlerinde belgilengen tártibi buzılǵan, sonıń ishinde, elektron hújjetti, sorawdı, arza beriwshiniń atınan múrájattı qabıllaw biykarlanǵan jaǵdayda hámeldar shaxslarǵa hám xızmetkerlerge eń kem miynet haqınıń on esesinen jigirma esesine shekemgi muǵdarda járiyma salıwǵa tiykar boladı.
Bunnan soń Ózbekstan Respublikası Prezidentiniń 2017-jıl 18-dekabrde qabıl etilgen «Ózbekstan Respublikasın rawajlandırıw mámleketlik baǵdarlamaların qáliplestiriw hám qarjılandırıwdıń jańa tártibin engiziw haqqında»ǵı nızamınan kelip shıqqan halda «Investiciyalıq jumıs haqqında»ǵı nızamǵa, Ózbekstan Respublikasınıń Salıq, Byudjet, Bajıxana kodekslerine ózgerisler hám qosımshalar kirgiziwdi názerde tutatuǵın nızam joybarı kórip shıǵıldı.
Deputatlar bul nızamnıń qabıl etiliwi menen ámeldegi nızam hújjetleriniń elimizdi rawajlandırıwdıń mámleketlik baǵdarlamaların qáliplestiriw hám qarjılandırıwdıń jańa tártibine muwapıqlıǵı támiyinleniwin ayrıqsha atap ótti.
Májiliste parlamenttiń Nızamshılıq palatasınıń wákilliklerine tiyisli basqa da máseleler dodalandı.
Ózbekstan Respublikası Oliy Majlisi
Nızamshılıq palatasınıń Málimleme xızmeti