14-yanvar – Watan qorǵawshıları kúni

Qanlıkól rayonındaǵı ulıwma orta bilim beriw mektepleriniń 10-11-klass oqıwshıları (er-balalar) arasında «Er jigit shańaraq tiregi, Ana Watan qorǵawshısı» atamasında áskeriy sport jarısı ótkerildi.
Ózbekstan Respublikası Qurallı Kúshleri dúzilgenine 33 jıl tolıwı hám «14-yanvar – Watan qorǵawshıları kúni» múnásibeti menen Qanlıkól rayonı Mektepke shekemgi hám mektep bilimlendiriwi bólimi, Qorǵanıw bólimi hám Jaslar isleri agentligi Qanlıkól rayonlıq bólimi menen birgelikte ótkerilgen bul ilaj oqıwshı-jaslardıń óz Watanına degen sheksiz súyishpenshiligin arttırıw, mámleket táǵdiri ushın juwapkershilik sezimin oyatıw, er jigittiń áskeriy minnetli wazıypasın ótewge degen qızıǵıwshılıǵın joqarılatıw, shańaraq aldındaǵı juwapkershilik sezimlerin qáliplestiriw, olardıń fizikalıq hám intellektuallıq qábiletin arttırıw, sonday-aq, olardıń qısqı dem alıs waqıtların mazmunlı ótkeriwge qaratılǵanlıǵı menen áhmiyetli boldı.
Ilajda atap ótilgenindey, milliy armiyamızdıń shegaralarımız qáwipsizligin, Watanımızdıń tınıshlıǵın támiyinlewdegi miynetleri teńsiz. Watan qorǵawshıları bar eken, elimiz tınısh, aspanımız ashıq, xalqımızdıń abadanlıǵı hám tatıwlıǵı dawamlı boladı.
Ótkerilgen jarıs 3 shártten ibarat bolıp, onda oqıwshılar 1-shártte test sheshiw, yaǵnıy kompyuterde dúzilgen 25 test sorawdı belgilew, 2-shártte turnikke tartınıw hám 3-shártte oq jaydan oq atıw shártleri tiykarında bellesti.
Jarıs juwmaǵında Qanlıkól rayonı qánigelestirilgen mektebiniń 11-klass oqıwshısı M.Aliev birinshi, 2-sanlı mekteptiń 11-klass oqıwshısı A.Jańabaev ekinshi hám 10-sanlı mekteptiń 10-klass oqıwshısı Q.Axımbetov úshinshi orınlardı iyeledi.

Qaraqalpaqstan xabar agentligi