Ózbekstan Respublikası Prezidenti Shavkat Mirziyoev 18-aprel kúni elimizge sapar etip kelgen Koreya Respublikası sırtqı isler ministri Kan Gyon Xva xanımdı qabıl etti.
Mámleketimiz basshısı miymandı shın júrekten qutlıqlap, Ózbekstan hám Qubla Koreya arasındaǵı kóp ásirlik doslıq baylanıslar bekkemlenip, strategiyalıq sheriklik qansıqları izbe-iz rawajlanıp atırǵanın tereń qanaatlanıwshılıq penen atap ótti.
Sóylesiwde 2017-jıl noyabr ayında Qubla Koreyaǵa joqarı dárejedegi tariyxıy sapar etiwde hám onıń juwmaǵında erisilgen áhmiyetli kelisimler Ózbekstan-Qubla Koreya óz-ara paydalı birge islesiwin sapa jaǵınan jańa basqıshqa kóteriwge hám anıq ámeliy mazmun menen bayıtıwǵa xızmet etkeni ayrıqsha atap ótildi.
Ellerimiz arasındaǵı sawda kórsetkishleri izbe-iz ósip barmaqta. Qubla Koreyanıń Ózbekstannıń ekonomikasına kirgizgen investiciyalarınıń kólemi 7 milliard dollardan astı. «Posko-DEU», «DjiES», «Evergrin», «Yanguan» hám basqa da kóplegen kompaniyalar menen birgelikte nırqı 5 milliard dollardan aslam jańa investiciyalıq joybarlar islep shıǵılmaqta.
Bıyılǵı jıldıń fevral ayında Tashkentte jańa formatta sawda-ekonomikalıq birge islesiw máseleleri boyınsha birinshi qospa húkimetleraralıq ushırasıw tabıslı ótkerildi.
Densawlıqtı saqlaw, mektepke shekemgi bilimlendiriw, qala basqarması, energetika, ekonomikanıń basqa tarmaqların hám sociallıq tarawdı rawajlandırıwda Qubla Koreyanıń aldınǵı tájiriybesi, ilimiy jetiskenlikleri hám texnologiyalarınan paydalanıwǵa qaratılǵan birgeliktegi baǵdarlamalar jedel ámelge asırılmaqta.
Koreya Respublikasınıń jetekshi qánigeleri elimizdiń ministrlikleri, vedomstvoları hám hákimlikleri tárepinen másláhátshi sıpatında tartılmaqta. Gumanitarlıq, bilimlendiriw hám turizm tarawlarında almasıwlar keńeymekte.
Ushırasıwda mámleketlerimiz arasındaǵı birge islesiwdi bunnan bılay da bekkemlew perspektivaları jáne xalıqaralıq hám regionallıq siyasattıń áhmiyetli máseleleri boyınsha pikir alısıldı.
Ózbekstan Respublikası Koreya Repsublikası Prezidenti Mun Chje In tárepinen Koreya yarım atawı hám pútkil regionda tınıshlıqtı jáne qáwipsizlikti támiyinlew boyınsha ámelge asırılıp atırǵan siyasattı tolıq qollap-quwatlaytuǵını atap ótildi.
Prezidentimiz rejelestirilip atırǵan joqarı dárejedegi ushırasıwlar ellerimiz aarsındaǵı qatnasıqlarda úlken áhmiyetke iye bolatuǵınına hám jańa perspektivalı kelisimlerge erisiwdi támiyinleytuǵınına isenim bildirdi.
Sırtqı isler ministri Prezidentimiz Shavkat Mirziyoevqa shın júrekten qabıl etkeni ushın minnetdarshılıq bildirip, Koreya Respublikası Prezidenti Mun Chje Inniń sálemin hám jaqsı tileklerin jetkerdi.
Miyman Qubla Koreya Ózbekstan Respublikası Prezidentiniń baslaması menen usı jılı mart ayında Tashkent qalasında bolıp ótken Awǵanstan boyınsha xalıqaralıq konferenciyanıń juwmaqların joqarı bahalaytuǵının, bul ánjuman, álbette, regionda turaqlılıqtı hám qáwipsizlikti támiyinlewge úlken úles bolıp qosılatuǵının atap ótti.
Ministr Ózbekstan Prezidentine Qubla Koreya puqaraları ushın vizasız tártip engiziw haqqında qabıl etilgen qarar ushın shın júrekten minnetdarshılıq bildirdi, ol sayaxatshılar aǵımın salmaqlı dárejede arttırıwǵa hám isbilermenlik baylanısların keńeytiwge xızmet etetuǵının atap ótti.
Ushırasıw sońında Kan Gyon Xva Qubla Koreya eki tárepleme strategiyalıq sheriklik qatnasıqların hám keń kólemli birge islesiwdi bunnan bılay da bekkemlewge tayar ekenin atap ótti.
ÓzA