Bunnan eki ay aldın 11 aylıq náresteniń denesinen 16 dana iyne tabılǵanı haqqındaǵı xabarlar tarqalǵan hám kóp pikir-talaslarǵa sebepshi bolǵan edi. Búgin usı náreste Azizbek Abdumajidovtıń densawlıǵı jaqsılanıp, úyine qayttı, dep xabar bermekte ÓzA.
Waqıya qalay bolǵan edi?
Azizbektiń anası perzentiniń tınıshsızlanıwınan táshwishke túsip, ózi jasaytuǵın jerdegi medicinalıq birlespege múrájat etken. Dáslepki tekseriwler nátiyjesinde onıń tamaǵı iskeni, temperaturasınıń joqarı ekenligi anıqlanıp, ayazlaw diagnozı qoyılǵan. Biraq, balanıń awhalı óz ornına kelmegennen soń onı rentgen tekseriwinen ótkergen hám denesinde iyne bar ekenligi belgili bolǵan. Bala hám onıń anası dárriw Respublikalıq qıstawlı medicinalıq járdem ilimiy orayına alıp barılǵan. Usı jıldıń 17-yanvar kúni bala 9 saat dawamında 10 ǵa shamalas shıpakerdiń qatnasıwında operaciya etilgen. Operaciya nátiyjesinde onıń denesinen 13 iyne alıp taslanǵan.
Onı operaciya etken balalar xirurgı D.Asadullaevtıń bildiriwinshe, náresteniń juwan ishegi, quwıǵı, kókirek boslıǵı, moyın bólegi, omırtqası, júregi astınan tabılǵan iyneler balanı eki ay dawamında qıynaǵan. Bala operaciyadan soń birneshe kún dawamında koma halatın bastan ótkergen.
Náresteniń denesinde ele iyne bar…
Shıpakerlerdiń bildiriwinshe, náresteniń denesinde ele 3 iyne bar. Biraq, bul iyneler onıń ómirine qáwip tuwdırmaytuǵın jerde jaylasqan. Medicinalıq analizlerge muwapıq, bul iynelerdiń bala densawlıǵına unamsız tásiri joq. Eger bul balanı jáne tınıshsızlandırsa, aldaǵı waqıtları olardı operaciyalıq jol menen alıp taslaw múmkin.
Balanıń denesine 16 iyne qaydan kirip qalǵan?
Bul haqqında házirshe anıq maǵlıwmat joq. Shıpakerler 11 aylıq náreste hesh qashan sonsha metalldı jutıp jibere almaytuǵınlıǵı, qızılóńesh hám asqazanda hesh qanday jaraqat izleri joq ekenligin bildirgen.
Azizbek bes jıldan berli qudaydan tilep alınǵan jalǵız perzent…
Azizbektiń shańaraq aǵzaları onıń densawlıǵınıń jaqsılanıp, úyine qaytqanlıǵınan quwanıshlı. Anası Sh.Boltabaevanıń aytıwınsha, Azizbek olardıń ómirlik joldası menen bes jıldan berli tilep alǵan jalǵız perzenti eken. Olar balasınıń ómirin saqlap qalıp, densawlıǵın jaqsı tárepke ózgerken shıpakerlerden oǵada minnetdar ekenligin bildirgen.
Qaraqalpaqstan xabar agentligi