Paytaxtımızdaǵı Nókis agroekonomika kásip-óner kolledjinde joqarı oqıw ornına kiriwdi qáleytuǵın abiturientler shet tilin biliw dárejesi haqqında mámleketlik úlgidegi B1 hám onnan joqarı dárejedegi sertifikatına iye bolıw maqsetinde sońǵı aymaqlıq imtixandı tapsırdı.
Usı jıldıń 13-14-fevral kúnleri imtixannıń dáslepki tıńlap túsiniw, oqıp túsiniw, leksikalıq hám grammatikalıq kompetenciya, jazıw kónlikpeleri boyınsha test sınaǵınıń juwmaǵı shıqtı.
Ózbekstan Respublikası Prezidentiniń 2012-jıl 10-dekabrdegi «Shet tillerin úyreniw sistemasın bunnan bılay da jetilistiriw ilajları haqqında»ǵı qararına muwapıq, xalıqaralıq tájiriybelerge súyengen halda shet tillerin biliw dárejesin bahalawdıń Milliy sisteması islep shıǵılıp, turmısqa engizildi.
Shet tilin biliw dárejesin anıqlaw hám mámleketlik úlgidegi sertifikattı beriw Ózbekstan Respublikası Ministrler Kabinetiniń 2013-jıl 31-dekabrdegi qararı menen tastıyıqlanǵan «Shet tilin biliw dárejesin anıqlaw hám sertifikat beriw haqqındaǵı reje»ge tiykarlanıp, bıyıl birinshi márte bilimlendiriw sistemasına engizilip atır.
Ózbekstan Respublikası Ministrler Kabinetiniń 2017-jıl 11-avgusttaǵı «Oqıw orınlarında shet tillerin oqıtıwdıń sapasın jáne de jetilistiriw ilajları haqqında»ǵı qararı boyınsha 2018-jıl 1-yanvardan baslap shet tilin biliw dárejesi haqqında mámleketlik úlgidegi sertifikatqa iye bolǵan oqıwshı hám oqıtıwshılarǵa bir qatar jeńillikler engizildi. Atap aytqanda, shet tilin biliw dárejesi haqqında A2, B1, B2 dárejesindegi sertifikat iyelerin tiyisli túrde orta arnawlı, kásiplik bilimlendiriw mákemelerine, joqarı oqıw orınlarınıń bakalavriatına hám magistraturasına kiriwde shet tili boyınsha ótkeriletuǵın test sınaǵınan azat etip, usı pánnen belgilengen maksimal ball beriledi. Al, usı sertifikatqa iye bolǵan ulıwma orta, orta arnawlı, kásiplik bilimlendiriw mákemeleriniń pedagogları attestaciyadan ótiw procesinde maksimal ball menen bahalanadı hám test sınaǵınan azat etiledi. Bul sertifikat 3 jıl dawamında kúshke iye.
– Bul jeńillikten paydalanıw niyeti menen sertifikat alıw ushın Qaraqalpaqstan Respublikasınan arza bergenlerdiń sanı 100 den aslam bolıp, Tashkent qalasında shet tilin biliw dárejesin anıqlaw ushın bolıp ótken test sınaqlarınıń dáslepki nátiyjeleri usı jıldıń 13-14-fevral kúnleri járiyalandı. Olardan shet tilleri boyınsha keyingi – awızsha imtixan Nókis qalasında alındı, – deydi Mámleketlik test orayınıń Qaraqalpaqstan Respublikası boyınsha turaqlı wákili Muzaffar Abdullaev. – Imtixan ushın arzalar qabıllaw usı jıldıń 29-yanvar sánesinde juwmaqlandı. 10-marttan baslap nsfla.uz saytında taǵı da arzalar qabıllawdı baslaw hám aprelde imtixanlardıń ótkeriliwi rejelestirilmekte.
– Jiyenim Madina Baxtıǵanieva hám basqa da oqıwshılarım menen B1 kategoriyalı sertifikattı alıw ushın shet tili boyınsha awızsha imtixandı tapsırıw ushın keldik, – deydi Beruniy rayonı 27-sanlı ulıwma orta bilim beriw mektebiniń inglis tili oqıtıwshısı Gúlbanu Tólegenova. – Eń dáslep Mámleketlik test orayınıń saytına arza tapsırıp, imtixanlarda qatnasıw ushın tólem, 258 mıń sum tóledik hám Tashkent qalasına jollama aldıq. 3 mıńnan aslam abiturient qatnasqan, Tashkent qalasında ótkerilgen test sınaǵında rayonımızdan jámi 29 talaban óz bilimin sınap kórdi.
M.PIRNAZAROVA,
Qaraqalpaqstan xabar agentliginiń xabarshısı.