Sońǵı waqıtlarda Báseki komitetine kóp kvartiralı turaq jaylardıń qurılısı boyınsha múrájatlar kóbeygen. Sonıń ishinde, bıyılǵı jıldıń ótken dáwirinde 1700ge shamalas múrájatlar kelip túsken. Kórilgen ilajlardıń nátiyjesinde 20 milliard sumǵa shamalas qarjılar tutınıwshılardıń paydasına qayta esap-sanaq etildi.

Bul jaǵdaylar boyınsha respublikadaǵı 129 qurılıs kárxanalarınıń shártnamaları tallanǵanda kóplegen kemshilikler bar ekenligi anıqlandı.
« Tutınıwshılardıń huqıqların qorǵaw haqqında»ǵı nızamǵa tiykarlanıp, mámleket tutınıwshılardıń tovar (jumıs, xızmet) satıp alıwı hám onnan paydalanıw waqtındaǵı huqıqları hám nızam menen qorǵalatuǵın mápleri qorǵalıwın kepillew, tutınıwshı satıwshı menen shártnamalıq qatnasıqlarda nızamshılıqta názerde tutılǵan óz talaplarınıń qanaatlandırıwı ushın tiykarǵı huqıqqa iye ekenligi belgilengen.
Komitet turaq jay satıp alıwda shárnama shártleri menen tolıq tanısıp shıǵıwdı, tiykarǵı jaqları, yaǵnıy qurılıs múddetleri, táreplerdiń huqıq hám minnetleri, olardıń óz-ara teń salmaqlıǵı, qurılıs hám paydalanıwǵa tapsırıw múddetleri, múddetler boyınsha juwapkershilik názerde tutılǵanlıǵına, kompaniyanıń is tájiriybesi hám qurıwshınıń isenimliligine isenim bildiriwdi sorap qaladı. Onda elektron dizim hám «Ashıq qurılıs» sistemasında bar ekenligin ashıq dereklerden tekseriw múmkin.

N.Rahmonova, ÓzA