Ózbekstan Respublikası Prezidentiniń 2024-jıl 23-sentyabrdegi «Kámbaǵallıqtan abadanlıqqa qaray baǵdarlamasın ámelge asırıw boyınsha birinshi gezektegi ilajlar haqqında» ǵı PQ-330-sanlı qararında belgilengen wazıypalardıń orınlanıwın támiyinlew boyınsha respublikamızdıń barlıq aymaqlarında bolǵanı sıyaqlı, Qaraózek rayonında da bir qatar qayırqomlıq ilajları ámelge asırılmaqta.

Atap aytqanda, Prezident qararı tiykarında rayonda jasawshı kem támiyinlengen shańaraqlar bir qatar qáwender shólkemlerge biriktirilip, olardı hár tárepleme qollap-quwatlaw boyınsha kóplegen iygilikli isler alıp barılmaqta.
Jańa jıl bayramı qarsańında usınday qáwenderlik ilajları akcionerlik kommerciyalıq «Xalıq bank»tiń Qaraózek bank xızmetler orayı tárepinen ótkerildi. Oray baslıǵına biriktirilgen Berdaq awıl puqaralar jıyınında jasawshı 5 kem támiyinlengen shańaraqlardan xabar alındı.
Ilaj dawamında bul shańaraqlardıń mashkalaları tıńlanıp, hár bir úyge bayram sawǵası sıpatında 2 mln sumnan qarjılay járdemler kórsetildi.

Adilbay Orazov,
Qaraqalpaqstan xabar agentligi sholıwshısı.