Nukus shahridagi “Xalqlar do‘stligi” maydonida o‘rnatilgan Yangi yil archasi atrofida Berdaq nomidagi Qoraqalpoq davlat universiteti tomonidan faol talaba-yoshlarni taqdirlash marosimi o‘tkazildi.
Tadbirda universitet rektori, akademik A.Reymov talaba-yoshlarni yangi yil bayrami va qo‘lga kiritgan yutuqlari bilan muborakbad etib, davlatimiz tomonidan berilayotgan keng imkoniyatlarni alohida qayd etdi. Shuningdek, ushbu imkoniyatlardan oqilona foydalanish, o‘z ustida muntazam ishlash va kelgusida Vatanimiz ravnaqi yo‘lida fidokorona xizmat qilish zarurligini ta’kidladi.
“Yil talabasi – 2024” respublika tanlovining universitet bosqichida talaba-yoshlar 7 ta nominatsiya bo‘yicha ishtirok etib, unda uzluksiz (akademik tanaffussiz) kunduzgi ta’lim shaklida tahsil olayotgan 2-3 va 4 bosqich talabalari o‘rtasida ishtirokchilarning joriy yilda o‘zlari tomonidan yaratgan ilmiy ishlari, ixtirolari, innovatsion g‘oyalari, ratsionalizatorlik takliflari e’tirof etildi.
Shundan so‘ng, “Yil talabasi – 2024” tanlovi bo‘yicha mazkur oliy o‘quv yurti bosqichi g‘oliblari hamda jamoat ishlarida faollik ko‘rsatib kelayotgan bir qator talaba-yoshlar rag‘batlantirildi.
Tadbir madaniyat xodimlari tomonidan tayyorlangan konsert dasturi bilan davom etdi.
Dovud Abibullayev,
O‘zA muxbiri