Har bir inson uchun farzandli boʻlish cheksiz quvonch, farzandiga tugʻilganlik haqidagi guvohnoma olish, uni tegishli idoralarga roʻyxatga qoʻyish va farzand tugʻilganda beriladigan bir martalik nafaqa pulini olish shirin tashvishlar boʻlsada, hujjat toʻplash uchun idorama-idora yugurishini oʻylasa, bu achchiq haqiqatga aylanishi aniq.
Endilikda, Davlat xizmatlari agentligi tomonidan aholiga yana-da qulaylik yaratish maqsadida, manfaatdor vazirlik va idoralar bilan hamkorlikda tugʻilish bilan bogʻliq boʻlgan davlat xizmatlarini kompozit tarzda koʻrsatish tartibini bosqichma-bosqich joriy etish rejalashtirilmoqda.
Bu nima degani?
Bunda, tugʻruqxonadan bola tugʻilganligi toʻgʻrisida maʼlumotnoma berish, FHDYO boʻlimida bola tugʻilganligini qayd qilish, bolani otasi yoki onasining doimiy yashash manziliga roʻyxatga qoʻyish, farzand tugʻilganda beriladigan bir martalik nafaqa pulini olish, poliklinikaga roʻyxatga qoʻyish va bolani maktabgacha taʼlim muassasasiga navbatga qoʻyish kabi harakatlar elektron ravishda bir vaqtda amalga oshiriladi.
Ushbu davlat xizmatidan foydalanish uchun birgina FHDYO boʻlimiga murojaat qilishning oʻzi kifoya.
Mazkur davlat xizmatlarini kompozit tarzda koʻrsatish tartibining joriy etilishi fuqarolarning ortiqcha hujjat toʻplashlariga, davlat idoralari oʻrtasida sarson boʻlib, eshikma-eshik sargʻayib yurishlariga barham beradi.
Natijada, ushbu davlat xizmatlaridan foydalanish orqali iqtisod qilingan vaqt va mablagʻlar farzandlarini bekamu-koʻst ulgʻaytirishga, ularga taʼlim-tarbiya berishga zamin hozirlaydi.
O’zA