Bu yilgi Yevropa chempionlar ligasi kutilmagan natijalarga boy o‘tmoqda.
Musobaqaning to‘rtinchi turida “Jirona” safarda “PSV” bilan raqobatlashdi. Uchrashuvning 16-daqiqasida “PSV” vakili Flamingo hisobni ochdi, 33-daqiqada Malik Tilman gol urib, farqni ikkitaga oshirib qo‘ydi. Bahsning 83-daqiqasida Yohan Bakayoko jamoasining uchinchi goliga mualliflik qilgan bo‘lsa, Ladislav Kreychich 88-daqiqada to‘rtinchi golni urib, o‘yin taqdirini hal qildi.
Shu tariqa “PSV” ushbu turnirda o‘zining ikkita rekordini o‘rnatdi. Anqirog‘i, jamoa hech qachon Chempionlar ligasi o‘yinida to‘rtta gol urmagan. “Jirona” ustidan qozonilgan bu g‘alaba klubning Yevropadagi eng yirik g‘alabasiga aylandi.
YeCHL 4-turining markaziy bahsi deya e’tirof etilgan o‘yin Madrid shahridagi “Santiago Bernabéu” stadionida o‘tdi. Unda “Real” va “Milan” klublari o‘zaro to‘qnashdi. So‘nggi yillardagi qayd etilayotgan natijalarga ko‘ra uchrashuvda “Real Madrid” klubining imkoniyati yuqori baholangan bo‘lsa-da, o‘yin va qayd etilgan natija “Milan” foydasiga bo‘ldi.
Gap shundaki, bu jamoalar bahsida “Milan” safarda 3:1 hisobida g‘alaba qozonib, muhim uch ochkoni qo‘lga kiritdi.
Bu turning yana bir kutilmagan natijasi “Sporting” – “Manchester Siti” uchrashuvida qayd etildi. Ushbu bahsning 4-daqiqasida “MS” jamoasi a’zosi Foden hisobni ochdi. Bu holatdan ruhlangan “shaharliklar”da navbatdagi g‘alabaga katta ishonch uyg‘ondi. Ammo, mezbonlar buning aksini ko‘rsatdi. Tezkor gol o‘tkazib yuborgan bo‘lsa-da “Sporting” klubi o‘yin tizginini o‘z qo‘liga oldi. Natijada Viktor Dyokereshning xetrigi va Maksimiliano Arauxoning bitta goli evaziga “Manchester Siti” 4:1 hisobida mag‘lub etildi.
O‘tgan yilgi mavsumda ancha shov-shuv ko‘targan “Bayer” klubi 4-turda “Liverpul” mehmoni bo‘ldi. Turning markaziy uchrashuvida Luis Dias raqib darvozasiga uchta gol urgan bo‘lsa, Gakponing bir goli “Liverpul”ning yirik – 4:0 hisobidagi g‘alabasini ta’minladi.
Shuningdek, kechagi bahslarda “Lill” – “Yuventus” 1:1, “Bratislava” – “Dinamo Zagreb” 1:4, “Borussiya Dortmund” – “Shturm” 1:0, “Seltik” – “RB Leypsig” 3:1, “Bolonya” – “Monako” 0:1 natijalari qayd etildi.
Bugun, 6 noyabr kuni 4-tur doirasida quyidagi bahslar bo‘lib o‘tadi.
4-tur:
“Bryugge” – “Aston Villa”;
“Shaxtyor” – “Yang Boyz”;
“Sparta Praga” – “Brest”;
“Bavariya” – “Benfika”;
“Inter” – “Arsenal”;
“Feyenoord” – “Zalsburg”;
“Srvena zvezda” – “Barselona”;
“PSJ” – “Atletiko Madrid”;
“Shtutgart” – “Atalanta”.
Javohir Toshxo‘jayev,
O‘zA