Ertaga Falcon 9 raketasi Starlink tizimi global Internet tarmog‘ining orbital turkumini to‘ldirish uchun yana 22 ta mini-sun’iy yo‘ldoshlar partiyasini orbitaga olib chiqadi, deya xabar berdi SpaceX kompaniyasi.
Uchirish Florida shtatidagi AQSH kosmik kuchlari bazasida joylashgan 40-Uchirish majmuasidan Toshkent vaqti bilan tongi soat 06:00 da amalga oshiriladi.
Mazkur harakat Starlink loyihasi doirasida 2019 yil may oyidan buyon internet sun’iy yo‘ldoshlarining 98-, joriy yil hisobidan 29- uchirilishi bo‘ladi. SpaceX allaqachon orbitaga ushbu sun’iy yo‘ldoshlarning 4,8 mingdan ziyodini chiqargan. Ulardan ba’zilari muvaffaqiyatsizlikka uchragan, ayrimlari esa orbitadan chiqib ketgan.
Qayd etilishicha, ayni payt orbitada 4,5 mingdan ko‘p qurilma ish holatida qolmoqda.
O‘zA