Бурын хабар бергенимиздей, Мәмлекетлик басқарыў академиясында Орайлық сайлаў комиссиясы тәрепинен тастыйықланған Сайлаў комиссиялары ағзаларының маманлығын арттырыўды шөлкемлестириў концепциясы тийкарында Өзбекстан Республикасы Президенти сайлаўын өткериўши округлик сайлаў комиссияларының ағзалары ушын еки күнлик оқыў семинары болып өтти.
Округлик сайлаў комиссияларының баслықлары, баслықтың орынбасарлары, хаткерлери және ағзалар қатнасқан тренинглерде Округлик сайлаў комиссияларының жумысын шөлкемлестириў, Округлик ҳәм УСК имаратлары ҳәм даўыс бериў ханаларын үскенелеў, Өзбекстан Республикасы Президенти сайлаўының конституциялық-ҳуқықый тийкарлары, сайлаўды өткериўши сайлаў комиссиялары ўәкилликлери ҳәм ўазыйпалары, сайлаўшылар дизими менен ислесиў сыяқлы темаларда сабақлар өтилди.
Орайлық сайлаў комиссиясында болып өткен илажда Өзбекстан Республикасы Президенти сайлаўын өткериўши 14 округлик сайлаў комиссияларының баслықларына гүўалықлар, Өзбекстан Республикасы Президенти сайлаўын өткериўши округлик сайлаў комиссияларының мөри ҳәм канцелярия өнимлери тапсырылды.
ОСК администрациясы ҳәм ағзалары, ҒХҚ ўәкиллери қатнасқан илажда сайлаў нызамшылығындағы өзгерислер ҳәм жаңалықлар ҳаққында ҳәр тәреплеме сөз болды.
Сайлаў кодексиниң 21-статьясына муўапық, Өзбекстан Республикасы Президенти сайлаўын өткериў бойынша округлик сайлаў комиссиясы Орайлық сайлаў комиссиясы тәрепинен сайлаўға кеминде жетпис күн қалғанында комиссия баслығы, баслықтың орынбасары, хаткеринен ҳәм комиссияның сегиз – он сегиз басқа ағзаларынан ибарат қурамда дүзиледи. Өзбекстан Республикасы Президенти сайлаўын ҳәм Нызамшылық палатасы депутатлары сайлаўын өткериў бойынша округлик сайлаў комиссиялары ағзалығына талабанлар Қарақалпақстан Республикасы Жоқары Кеңесиниң, халық депутатлары ўәлаятлар ҳәм Ташкент қалалық Кеңеслериниң мәжилислеринде додаланады ҳәм Орайлық сайлаў комиссиясының ағзалары жәмийетшиликтиң абырой-итибарлы ўәкиллери арасынан тастыйықланады.
Атап өтилгениндей, сайлаў процесслерин нызамлы, әдил, ҳадал ҳәм жоқары дәрежеде шөлкемлестириўде ҳәм өткериўде Округлик сайлаў комиссиясы ағзаларының орны үлкен әҳмийетке ийе.
ӨзА