Зәкаўат интеллектуаллық ойыны – елимизде қайсы жас аралығында болыўына қарамастан ҳәммени бир жерге жәмлестирип, олардың билими ҳәм ой-өрисин кеңейтип баратуғын таңлаў болып табылады.
Соның ишинде, республикамызда бул таңлаў тараў хызметкерлери арасында шөлкемлестирилип барылыўы да жақсы жолға қойылған.
Атап айтқанда, “Худудгаз Қарақалпақстан” газ тәмийнаты филиалының Жаслар аўқамы ҳәм Кәсиплик аўқамы комитети менен биргеликте шөлкемлестирилген гезектеги интеллектуаллық ойыны шөлкемлестирилди.
Оған “Худудгаз Қарақалпақстан” газ тәмийнаты филиалының қала ҳәм районлық бөлимлеринен дүзилген командалары қатнасып, өзлериниң зийреклигин ҳәм тез ойлаў қәбилетлерин сыннан өткерди.
Социаллық руўхый билимлерди және де беккемлеў, әмелий көнликпелерди раўажландырыў, жәмийетлик турмыстағы белсендилигин арттырыў, хызметкерлердиң бос ўақытларын мазмунлы шөлкемлестириў, логикалық пикирлеў дәрежесин арттырыў мақсетинде шөлкемлестирилген интеллектуаллық ойын жуўмағында, биринши орынды Қоңырат районлық газ тәмийнаты бөлими, екинши орынды Шоманай районлық газ тәмийнаты бөлими ҳәм сыйлы үшинши орынды Қанлыкөл районлық газ тәмийнаты бөлиминиң командалары ийелеўге миясар болды.
Таңлаў соңында жеңимпазларға шөлкемлестириўшилер тәрепинен таярланған баҳалы саўғалар тапсырылып, биринши орынды ийелеген Қоңырат районлық газ тәмийнаты бөлими командасына таңлаўдың Ташкент қаласында болып өтетуғын Республикалық басқышына жоллама берилди.
Адилбай Оразов,
Қарақалпақстан хабар агентлиги шолыўшысы