Қарақалпақстан Республикасы Педагогикалық шеберлик орайында улыўма орта билим бериў мәкемелери ҳәм агентликке қараслы қәнигелестирилген мектеплердиң педагог-хызметкерлери арасында «IV Дөретиўши муғаллимлер Олимпиадасы»ның Қарақалпақстан Республикалық басқышы болып өтти.
Республикамыздың барлық аймақларынан дөретиўши муғаллимлер қатнасқан таңлаў белгиленген шәртлер бойынша өткерилип, онда ҳәр бир дөретиўши топардың ислеген жумыслары тәжирийбели төрешилер тәрепинен мүнәсип түрде баҳаланып барылды.
Солай етип, қызықлы өткен таңлаў шәртлери жуўмағында 39,7 балл топлаған Тахтакөпир районындағы 3-санлы улыўма орта билим бериў мектебиниң дөретиўши муғаллимлери биринши орынды ийелеўге миясар болды ҳәм таңлаўдың Өзбекстан Республикасы басқышына жолламаны қолға киргизди.
Сондай-ақ, биринши орын ийелерине билимлендириў тараўының раўажланыўына салмақлы үлес қосып атырғаны ушын Қарақалпақстан Республикасы Мектепке шекемги ҳәм мектеп билимлендириўи министрлиги тәрепинен «Қарақалпақстан Республикасы халық билимлендириў ағласы» көкирек белгиси тапсырылды.
Ал, таңлаўда 38,8 балл топлаған Кегейли районы муғаллимлери екинши, 38,7 баллды қолға киргизген Қанлыкөл районы муғаллимлери үшинши орынды ийелеўге еристи.
Соның менен бирге, илаж даўамында Қарақалпақстан Республикасы Министрлер Кеңеси ҳәм Қарақалпақстан Республикасы Миллий гвардия басқармасы тәрепинен билимлендириў тараўында мийнет етип атырған бир қатар пидайылар «Ҳүрмет жарлығы» менен сыйлықланды.
Адилбай Оразов,
Қарақалпақстан хабар агентлиги шолыўшысы