Өзбекстан Республикасы Олий Мажлиси Сенаты Кенгашиниң арнаўлы қарарына муўапық, сенаторлар ҳәм халық депутатлары жергиликли Кеңеслердиң депутатлары, Сенат жанындағы Жаслар парламенти ағзалары «Парламент ойынлары» спорт жарысларында мини футбол, волейбол, стол тенниси ҳәм бадминтон сыяқлы спорт түрлери бойынша беллескен еди.
Бүгин Нөкис қаласындағы 1-санлы балалар ҳәм жас өспиримлер спорт мектебинде (Манеж) Өзбекстан Республикасы Олий Мажлиси Сенаты Баслығы кубоги ушын «Парламент ойынлары» спорт жарысларының Қарақалпақстан Республикасы ҳәм Хорезм ўәлаяты басқышы жеңимпазлары арасында аймақлық басқыш ойынлары өткерилди.
Белгиленген спорт түрлери бойынша өткерилген жарысларда жеңимпазлар анықланып, олар жарыстың республикалық басқышына жолламаларды қолға киргизди.
Жарыстың сыйлықлаў мәресимине Қарақалпақстан Республикасы Жоқарғы Кеңеси Баслығының орынбасары Р.Сапарбаев қатнасып, жарыс жеңимпазларын қызғын қутлықлап, оларға кейинги басқышта да табыслар тиледи.
Жарыс жуўмағында жеңимпазлар ҳәм сыйлы орын ийелери шөлкемлестириўшилер тәрепинен баҳалы саўғалар менен сыйлықланды.
-Халық депутатлары Нөкис районлық Кеңесиниң депутатлары Хорезм ўәлаятыныӊ Қўшкўпир районы депутатлары менен волейбол бойынша беллесип 2:1 есабында жеӊиске еристи ҳәм Ташкент қаласында болып өтетуғын республика басқышына жолламаны қолға киргизди,-дейди жарыс қатнасыўшысы Нурлыбек Қыдырниязов.- Ташкент қаласында болып өтетуғын жарыста да командамыз ағзалары менен жақсы қатнасып, жеңимпазлықты қолға киргизиўге ҳәрекет етемиз.
Адилбай Оразов,
Қарақалпақстан хабар агентлиги шолыўшысы