Санлы технологиялар министри Шерзод Шерматов Швейцарияның Өзбекстандағы елшиханасы миссиясы басшысының орынбасары Андрин Финк пенен ушырасыў өткерди. Онда Өзбекстанда IТ-билимлендириўди раўажландырыў, халықаралық бирге ислесиўди кеңейтиў ҳәм жаңа жойбарларды әмелге асырыў мәселелери додаланды.
Ушырасыўда Швейцария раўажланыў ҳәм бирге ислесиў агентлиги ҳәм IТ-билимлендириў ассоциациясы арасында «Өзбекстанда IТ ҳәм санлы билимлендириў ландшафтын раўажландырыў инклюзивлик өсиў ушын мәпдар тәреплерди байланыстырыў» жойбары шеңберинде келисим шәртнамасына қол қойылды.
Бул жойбар санлы билимлендириў арқалы жәмийетте инклюзивлик өсиўди тәмийинлеў ҳәм экономикалық раўажландырыўды жеделлестириўди мақсет еткен. Жойбар шеңберинде жаслардың IТ саўатлылығын арттырыў, маманлық арттырыў имканиятларын бериў, сондай-ақ, алыс аймақларда жасайтуғын жаслар ҳәм ҳаял-қызларды жумыс пенен тәмийинлеў нәзерде тутылған.
Жойбардың биринши басқышы шеңберинде халықтың санлы көзқарасларының жағдайы талланды. Базар талапларына сәйкес жаңа кәсиплер анықланды ҳәм IТ-билимлендириў ресурсларын бирлестиретуғын платформа ислеп шығылады.
Жойбар шеңберинде IТ-билимлендириў бағдарын раўажландырыў ушын Швейцария раўажланыў ҳәм бирге ислесиў агентлиги тәрепинен IТ-билимлендириў ассоциациясы мәмлекетлик емес коммерциялық емес шөлкемине 150 мың доллар муғдарында грант қаржысы ажыратылды.
Швейцария менен алып барылып атырған бул бирге ислесиў мәмлекетте санлы трансформация процесин тезлестиреди. Сондай-ақ, экономикалық имканиятларды кеңейтеди ҳәм Өзбекстанның IТ базарында халықаралық бәсекиге шыдамлылығын арттырыўға хызмет етеди.
Н.Раҳмонова, ӨзА