Нөкис қаласындағы 1-санлы спорт мектебинде спорттың гандбол түри бойынша 16 жасқа шекемги жас өспиримлер ҳәм қызлар арасында Қарақалпақстан Республикасы кубоги ушын жарыс өткерилди.
Оған Нөкис қаласы ҳәм районлардан командалар қатнасып, өз-ара беллести.
Жарысты өткериўден мақсет – республикамызда гандбол спорт түрин раўажландырыў, спорт шеберлерин жетилистириў, күшли спортшыларды анықлаў, Қарақалпақстан Республикасы сайланды командасын муўапықластырып алыў ҳәм Қоқанд қаласында өткерилетуғын Өзбекстан кубоги ушын болып өтетуғын жарысларға спортшыларды таңлаў болып есапланады.
Жарыс халықаралық қағыйдаларға муўапық өткерилип, оның барысы тәжирийбели төрешилер тәрепинен бақлап барылды.
Жарыс жуўмағы бойынша ер балалар арасында Нөкис қаласы командасы биринши, Шымбай районы командасы екинши, Қанлыкөл районы командасы үшинши орынды ийеледи.
Ал, қызлар арасында да Нөкис қаласы командасы биринши, Шымбай районы командасы екинши, Мойнақ районы командасы үшинши орынды ийеледи.
Жеңимпазлар Қарақалпақстан Республикасы Жаслар сиясаты ҳәм спорт министрлиги тәрепинен таярланған диплом ҳәм естелик саўғалары менен сыйлықланды.
Қарақалпақстан хабар агентлиги