Футбол бойынша Испания Ла Лигасының 33-турынан орын алған бир қатар ушырасыўлар 2-май, шийшемби күни өткерилди.
“Барселона” өз майданында “Осасуна”ны қабыллады. Ушырасыўдың 26-минутында мийманлар бир ойыншы аз болып ойнады. Каталонлар 85-минутқа келип есапты ашыўға еристи. Хорди Алба гол урып, Барселонаға 3 упай алып берди.
Және бир ойын “Реал Сосьедад” ҳәм “Реал Мадрид” командалары арасында болды. Ушырасыўдың биринши бөлиминде гол урылмады. Екинши бөлимниң екинши минутында Мадрид командасына тийисли болған ҳәм ҳәзирги ўақытта Сан-Себастян клубында ижарада ойнап атырған Такефуса Кубо есапты ашты.
“Реал” 61-минутта Дани Карвахалдың шетлетиўинен кейин майданда бир ойыншы аз болып қалды. 85-минутта Андер Барренечеа майдан ийелериниң және бир голына авторлық етти.
Азизбек Дабылов,
ҚМУ Интернет журналистикасы
тәлим бағдарының 4-курс студенти,
Қарақалпақстан хабар агентлиги