Өзбекстан Республикасы Денсаўлықты сақлаў министрлигиниң басламасы менен Жиззах ўәлаятында ислеп шығарылған 10 заманагөй «Volkswagen Caddy» қыстаўлы медициналық жәрдем машиналары Қарақалпақстанға алып келинди.Қарақалпақстан Республикасы Денсаўлықты сақлаў министрлиги системасындағы ескирген қыстаўлы медициналық жәрдем машиналары заманагөй, ең соңғы медициналық жәрдем әсбап-үскенелери менен тәмийинленген автомобильлерге алмастырылмақта. Атап айтқанда, Әмиўдәрья, Елликқала, Төрткүл районларына 6, Беруний, Бозатаў, Шымбай, Кегейли районларына 4 автомобиль берилди.
– «Volkswagen Caddy» моделиндеги қыстаўлы медициналық жәрдем машинасы наўқаслардың шақырыўларына белгиленген ўақытта жетип барыў, қыстаўлы медициналық жәрдем хызметкерлериниң жумысын және де жеңиллетиў мүмкиншиликлерине ийе болып, ҳәрекетлениў тезлиги жоқары ҳәм наўқаслар ушын қолайлы транспорт, -дейди Бозатаў районлық медицина бирлеспеси тез жәрдем бөлиминиң шофёры А.Нажимов.
Қарақалпақстан Республикасы Денсаўлықты сақлаў министри М.Қурбанов жаңа машиналардың гилтлерин районлық медицина бирлеспелериниң шофёрларына салтанатлы түрде тапсырды.
Қарақалпақстан хабар агентлиги
М.ҲӘБИЙБУЛЛАЕВтың түсирген сүўретлери