27-июль күни мини футбол бойынша Мәмлекетлик қәўипсизлик хызмети кубоги ушын жарыстыӊ финаллық ойыны болып өтти.
Онда Нөкис районыныӊ финалға шекем барлық қарсыласларын жеӊип шыққан «Ақмаӊғыт» ҳәм Төрткүл районыныӊ «Уллыбағ» командалары өз-ара күш сынасты.
Оғада қызықлы болып өткен ойынныӊ тийкарғы ўақты 3-3 есабы менен жуўмақланды. Буннан соӊ пенальтилер сериясына нәўбет берилип, оныӊ жуўмағында қарсыласларына қарағанда анығырақ ҳәрекет еткен төрткүлли жаслар Мәмлекетлик қәўипсизлик хызмети кубогиниӊ ийесине айланды.
Сондай-ақ, усы күни кубок жарысларында 3-орын ийеси да анықланды. Бул ойында Нөкис қаласыныӊ «Нәўпир» командасы ағзалары Тахтакөпир районы жаслары үстинен 2-1 есабында жеӊиске еристи ҳәм өз жанкүйерлерин қуўанышқа бөледи.
Жарыс соӊында жеӊимпаз командалар арнаўлы кубок, диплом ҳәм қымбат баҳалы естелик саўғалар менен сыйлықланды.
Қарақалпақстан хабар агентлиги