Шымбай районлық Халық билимлендириў бөлимине қараслы 17-санлы улыўма орта билим бериў мектебинде питкериўши оқыўшыларды кәсипке бағдарлаў мақсетинде Бердақ атындағы Қарақалпақ мәмлекетлик университети оқытыўшылары менен ушырасыў кешеси болып өтти.
Ушырасыўда қарақалпақ филиологиясы ҳәм журналистикасы факультетиниң оқытыўшылары доцент Г.Абишов, Қ.Атабаев ҳәм М.Палымбетовалар шығып сөйлеп, 2021-2022-оқыў жылында жоқары оқыў орынларының бакалавриат тәлим бағдарларына оқыўға қабыллаў,тест сынақларын өткериў тәртиби бойынша түсиник ҳәм мәсләҳәтлер, абитуриентлерге қарақалпақ филиологиясы ҳәм журналистикасы факультетинде оқыў процеси туўралы кеӊ түсиниклер берип, оқыўшыларды усы бағдарлар бойынша оқыўға мирәт етти.
Сондай-ақ, қарақалпақ тил билими кафедрасы доценти М.Палымбетова ҳәм университеттиң “Китапқумарлар” клубы жетекшиси Турдыбек Наўрызбаевлар менен биргеликте мектептиң 8-9-10-класс оқыўшылары арасында “Зәкаўат”интелектуаллық ойыны шөлкемлестирилип, жарыс соңында жеңимпаз командаларға баҳалы сыйлықлар тапсырылды.
Зоя Қулымбетова,
Шымбай районлық ХББ ға қараслы 17-санлы мектеп муғаллими.
Қарақалпақстан хабар агентлиги