Ҳәр қандай тараўдың раўажланыўы, инсан ой-өрисиниң байыўы негизинде, әлбетте илим болады.
Ҳүрметли Президентимиздиң Олий Мажлиске жоллаған Мүрәжатында «Илим жоқ жерде артта қалыўшылық, жаўызлық ҳәм әлбетте, дурыс жолдан адасыў болады», деп айрықша атап өткени тегин емес.
Мәмлекетимизде математика илиминиң раўажланыўында Президентимиздиң 2019-жыл 9-июльдағы «Математика билимлендириўи ҳәм пәнлерди буннан былай да раўажландырыўды мәмлекет тәрепинен қоллап-қуўатлаў, сондай-ақ, Өзбекстан Республикасы Илимлер академиясының В.И.Романовский атындағы Математика институты жумысын түп-тийкарынан жетилистириў илажлары ҳаққында»ғы қарары оғада айрықша әҳмийетке ийе болды.
Ҳәзирги ўақытта мәмлекетимизде математика пәниниң бир неше бағдары бойынша белгили илимпазлар ҳәм олардың басшылығындағы илимий мектеплер бар. Бул илимий мектеплердеги илимпазлар уллы ата-бабаларымыз қалдырған бай мийрас ҳәм дәстүрлерди даўам еттирип, математика илиминиң раўажланыўына үлкен үлес қоспақта.
Өзбекстан Республикасы Президенти Ш.М.Мирзиёевтиң 2021-жыл 24-августтағы Пәрманына муўапық мәмлекетимиздиң экономикалық потенциалын арттырыў, оның дүнья жүзи көлеминдеги абырайын жәнеде арттырыў, елимиздиң абатлығы, турмысымыз абаданлығын тәмийинлеў бағдарындағы уллы хызметлери, соңғы жылларда Жаңа Өзбекстанда жедел пәтлер менен алып барылып атырған түпкиликли реформалар процесиндеги белсендилиги, мәмлекет ҳәм халықтың мәплери жолындағы пидәкерлик мийнетлери, өндирислик ҳәм социаллық-руўхый тараўлардағы көп жыллық нәтийжели ҳәм үлгили хызмети, жас әўладты ўатансүйиўшилик руўхында тәрбиялаўға үлкен үлес қосып киятырған алымлардың бири – Шавкат Аюпов болып табылады.
Жаслардың пидайы устазы, физика-математика илимлериниң докторы, профессор, Өзбекстан Республикасы Илимлер Академиясының академиги, Өзбекстан Республикасы илим ғайраткери, Өзбекстан Республикасы Илим ҳәм техника тараўындағы Биринши дәрежели мәмлекетлик сыйлығының лауреаты, Өзбекстан Республикасы Олий Мажлиси Сенатының ағзасы ҳәм Өзбекстан Республикасы Илимлер Академиясы В.И.Романовский атындағы Математика институтының директоры Шавкат Абдуллаевич Аюпов «Өзбекстан Қаҳарманы» атағы менен сыйлықланды.
Ш.А.Аюпов – Өзбекстан илими, атап айтқанда, жоқары билимлендириўди раўажландырыўға үлкен үлес қосып киятырған ири илимпаз, операторлар алгебралары, квант итималлық теориясы ҳәм ассоциативлик емес алгебралар бағдарларында дүньяға белгили заманагөй илимий мектептиң тийкар салыўшысы болып есапланады. Академик Ш.А.Аюпов нәтийжели илимий ҳәм илимий-шөлкемлестириўшилик жумысын өзиниң педагогикалық жумысы менен тығыз байланысқан ҳалда алып бармақта.
Устаздың Қарақалпақстанда математика пәниниң илимий потенциалына қосып киятырған үлесин айрықша атап өтиў керек. Оның тиккелей басшылығында көплеген илим докторлары ҳәм илим кандидатлары жетилисип шықты. Сондай-ақ, илимпаз ҳәр жылы Қарақалпақ мәмлекетлик университети Математика факультетиниң қәбилетли студент жасларына оператор алгебраның әҳмийетли мәселелери бойынша сабақ берип келмекте.
Мухтар ИБРАГИМОВ,
Олий Мажлис Нызамшылық палатасының депутаты,
Илим, билимлендириў, мәденият ҳәм спорт мәселелери
комитетиниң ағзасы.
Қарақалпақстан хабар агентлиги