Қарақалпақстан Республикасын өзиниӊ спорттағы табыслары менен жәмийетшиликке кеӊнен танытып киятырған палўанларымыздыӊ бири Олимпиада ҳәм миллий спорт түрлери бойынша Нөкис жоқары спорт шеберлиги мектебиниӊ тәрбияланыўшысы Шарафатдин Балтабаев болып табылады.
1995-жылдыӊ 19-ноябри күни Әмиўдәрья районында исбилермен Полат Рахимовтың шаӊарағында туўылған Шарапатдин 1-санлы улыўма орта билим бериў мектебинде оқып билим алады. 2002-жылдан баслап Әмиўдәрья районындағы Балалар ҳәм жас өспиримлер спорт мектебинде дәслепки тренери Алишер Рахимовтың басшылығында спорттыӊ дзюдо түри менен шуғылланыўларды баслаған ол, район ҳәм республика көлеминдеги жарысларға қатнасып, бир қатар табысларды қолға киргизиўге миясар болады ҳәм 2009-жылы Шыршықтағы Олимпиада резервлери мектеп-интернатына оқыўға қабылланады.
Бул оқыў дәргайында да елимизге белгили тренерлерден тәлим алған Шарафатдин 2015-жылы Бердақ атындағы Қарақалпақ мәмлекетлик университетине оқыўға кирип, тренери Байрам Сатуллаевтан да дзюдо гүресиниӊ әлўан түрли сырларын үйренип барады ҳәм бир қатар спорт жарысларында сыйлы орынларды ийелеўге миясар болады.
Атап айтқанда, ол 2015-жылы Польша пайтахты Варшава қаласында өткерилген “European Open Warsaw” ашық турниринде 3-орын, 2015-жылы Кувейт мәмлекетинде ересеклер арасында болып өткен “Asian Championships Seniors 2015” Азия чемпионатында 2-орын, 2017-жылы Ташкент қаласында болып өткен “Tashkent Grand Prix 2017” спорт жарысында 3-орын, 2018-жылы Чехия пайтахты Прага қаласында болып өткен “Prague European Open 2018” спорт жарысында 3-орын, 2019-жылы Бирлескен Араб Әмирлигиниӊ Фужейрах қаласында ересеклер арасында болып өткен “Asian-Pacific Championships Seniors and Teams 2019” Азия-Тыныш океаны чемпионатында 2-орын, 2019-жылы “Tashkent Grand Prix 2019” спорт жарысында 1-орынды ийелеп, өз ықласбентлерин қуўанышқа бөлейди.
2019-жылы университетти тамамлаған Шарафатдин спорттағы карьерасын табыслы даўам еттирип, 2020-жылы Францияныӊ Париж қаласында болып өткен «Paris Grand Slam 2020» спорт жарысында 2-орын, 2021-жылы Израил мәмлекетиниӊ Тел-Авив қаласында болып өткен “Tel Aviv Grand Slam 2021” спорт жарысында 1-орын, 2021-жылы март айында Ташкент қаласында болып өткен “Tashkent Grand Slam” спорт жарысында 2-орын, 2021-жыл 6-9-апрель күнлери Қырғызстанныӊ Бишкек қаласында өткерилген «Osiyo-Okeaniya senior chempionships-2021» спорт жарысында 3-орынды ийелеп, Токиода болып өтетуғын Олимпиада ойынларыныӊ жолламасын қолға киргизиўге миясар болады.
Ҳәзирги күнлери Шарафатдин дзюдо бойынша Өзбекстан сайланды командасы қурамында Олимпиада ойынларында жеӊимпаз атаныў ушын, қызғын таярлықлар көрмекте. Бизлер қарақалпақстанлы гүрес жанкүйерлери атынан Шарафатдинге Токиода жеӊимпаз атанып, елимизге алтын медаль менен қайта оралыўына тилеклеслик билдирип қаламыз!
Адилбай Оразов,
Қарақалпақстан хабар агентлиги